Հայաստանի վարչապետ Նիկոլ Փաշինյանն այսօր՝ հունիսի 20-ին, մեկնում է Թուրքիա: Կառավարությունը հրապարակել է, թե ովքեր են ընդգրկված հայկական պատվիրակության կազմում, վարչապետի որոշմանը տեղեկանում ենք Egov.am-ում:
Փաշինյանի հետ Թուրքիա են մեկնում արտգործնախարար Արարատ Միրզոյանը, ԱԺ փոխնախագահ Ռուբեն Ռուբինյանը, որ հայ-թուրքական կարգավորման գործընթացում հայկական կողմի բանագնացն է, փոխարտգործնախարար Վահան Կոստանյանը, ՀՀ վարչապետի մամուլի քարտուղար Նազելի Բաղդասարյանը և այլք:
Պատվիրակության կազմում է նաև Պետական պաշտոնյաների ծառայության ղեկավար Արթուր Գասպարյանը, որը միշտ չէ, որ ուղեկցում է վարչապետին արտերկիր այցերի ժամանակ:
Ազգային ժողովի նախագահ Ալեն Սիմոնյանը հունիսի 17-ին հաստատել էր, որ Փաշինյանն այդ երկրի նախագահ Ռեջեփ Թայիփ Էրդողանի հրավերով կմեկնի Թուրքիա։
Հունիսի 17-ին 24news-ը հայտնել էր, որ Փաշինյանը Թուրքիայի նախագահի հետ քննարկելու է Ադրբեջանի հետ խաղաղության պայմանագրի կամ նմանատիպ մեկ այլ փաստաթղթի ստորագրման հարցը։
Փաշինյանը 2023 թվականին աշխատանքային այցով ժամանել էր Թուրքիա՝ մասնակցելու Էրդողանի երդմնակալության արարողությանը:
Վերջին անգամ Հայաստանի ԱԳ նախարարի գլխավորած պատվիրակությունը Թուրքիա էր մեկնել ապրիլին՝ Անթալիայի տնտեսական ֆորումին։
