Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան մեկնաբանել է ակցիան, որի ժամանակ Երևանի Կիևյան կամրջի վրա փակցվել էր Ռուսաստանի նախագահ Վլադիմիր Պուտինին վիրավորող պաստառ։
Զախարովան ենթադրել է, որ սա տեղի է ունեցել Հայաստանում ԱՄՆ դեսպանատան աշխատակցի հրահանգով։
«Այնտեղ աշխատում է երկու հազար մարդ։ Հնարավոր է՝ նրանցից ոմանք դեռ աշխատում են USAID-ի գումարներով»,- ասել է Զախարովան։
Նա նշել է, որ Ռուսաստանն ու Հայաստանն ունեն աշխատանքային լայն օրակարգ, և «փոքրամասնություններից շատերին» դա դուր չի գալիս։
«Այս ակցիաները խթանված բնույթ ունեն»,- ընդգծել է Զախարովան։
Երևանում մի խումբ հայ ակտիվիստներ մայիսի 20-ին ՌԴ նախագահ Վլադիմիր Պուտինի հասցեին վիրավորանքներ պարունակող պաստառներ էին փակցրել, այդ թվում՝ Կիևյան կամրջի վրա և Ռուսաստանի դեսպանատան մոտ: Այս ակցիան համընկել է ՌԴ արտաքին գործերի նախարար Սերգեյ Լավրովի՝ Հայաստան կատարած այցի հետ։
