Դիվանագիտական աղբյուրները հաստատել են ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի միջև Վաշինգտոնում կայանալիք հանդիպումը, փոխանցում է «Կոմերսանտ»-ը։
Ըստ հրատարակության՝ նախապատրաստվում է այց՝ չնայած Բաքվից և Երևանից որևէ հայտարարության բացակայությանը։ Հրատարակությունը նաև գրում է, որ բանակցությունների ընթացքում կարող է ստորագրվել խաղաղության պայմանագիր կնքելու մտադրության մասին հուշագիր, որում Հայաստանն ու Ադրբեջանը կհաստատեն այդպիսի պայմանագիր կնքելու իրենց քաղաքական կամքը։
Սա իրավաբանորեն պարտավորեցնող փաստաթուղթ չէ, բայց դրա ստորագրումը Սպիտակ տանը թույլ կտա ԱՄՆ նախագահ Դոնալդ Թրամփին կրկին հանդես գալ որպես խաղաղարար՝ այս անգամ Հարավային Կովկասում, նշում է պարբերականը։
Օգոստոսի 5-ին Middle East Eye հրատարակությունը հայտնել էր, որ Հայաստանն ու Ադրբեջանը կարող են փոխըմբռնման հուշագիր ստորագրել օգոստոսի 8-ին։ Հրատարակության տվյալներով՝ արարողությունը տեղի կունենա Սպիտակ տանը՝ ԱՄՆ նախագահի ներկայությամբ, ով անձամբ կընդունի Փաշինյանին և Ալիևին։
Ավելի վաղ ադրբեջանցի լրագրող Ալեքս Ռաուֆօղլուն, հղում անելով աղբյուրներին, հայտնել էր, որ Թրամփը Սպիտակ տանը կընդունի Ալիևին և Փաշինյանին՝ խաղաղության պայմանագիր ստորագրելու համար։ Նախատեսվում է, որ Թրամփը նախ կհանդիպի Փաշինյանի, ապա՝ Ալիևի հետ, որից հետո երեք առաջնորդները համատեղ հայտարարություն կանեն։ Հայաստանի կառավարության մամուլի ծառայությունը ո՛չ հաստատել, ո՛չ էլ հերքել էր այս տեղեկությունը Armenia Today-ին։
