ՀՀ առաջին նախագահ Լևոն Տեր-Պետրոսյանը վարչապետ Նիկոլ Փաշինյանին կոչ է արել երկրի ներքին կայունության համար չեղարկել Վաղարշապատում նախատեսված հանրահավաքը, ազատ արձակել Բագրատ արքեպիկոպոս Գալստանյանին, Միքայել արքեպիսկոպոս Աջապահյանին և «Տաշիր» ընկերությունների խմբի նախագահ Սամվել Կարապետյանին։
«Հակադիր ուժերի դիմակայության վերացմանը կամ, թեկուզ, դրա մեղմացմանը մեծապես կնպաստեր Վաղարշապատում նախատեսված հանրահավաքի չեղարկումը և քաղբանտարկյալների, առաջին հերթին, Բագրատ և Միքայել Սրբազանների և Սամվել Կարապետյանի ազատ արձակումը։ Այսօր դա է Հայաստանի ներքաղաքական լարվածության թուլացման միակ միջոցը։ Վստահ եմ, որ այն ոչ միայն չի վնասի Փաշինյանի հեղինակությանը, այլ, ընդհակառակը, պետական այրին վայել այդ քայլը կգնահատվի համայն հայության կողմից»,- գրել է Տեր-Պետրոսյանը։
Նրա խոսքով՝ այդ քայլը դրական ազդեցություն կունենա նաև արտաքին ուժերի հետ ավելի վստահ դիրքերից բանակցելու նկատառումով։
Նախկին նախագահն ընդգծել է, որ ցանկացած պետության գլխավոր խնդիրը երկրի ներքաղաքական կայունության ապահովումն է, քանզի դրա հակոտնյան քաոսն է։
«Ցնցումներ, սովորաբար, հրահրում են ընդդիմադիր քաղաքական ուժերը, մինչդեռ Հայաստանում տեղի է ունենում ճիշտ հակառակը։ Տառապելով մեծամոլության սինդրոմով՝ Փաշինյանը, որպես կանոն, ինքն է թեժացնում իրավիճակը»,- նշել է նա։
Տեր-Պետրոսյանը Փաշինյանի՝ Վաղարշապատում հանրահավաք անցկացնելու քայլն արտառոց ու վտանգավոր է համարել երկրի ներքին կայունության և ժողովրդի անվտանգության տեսանկյունից։ Նա կոչ է արել դադարեցնել միմյանց հասցեին հնչող հայհոյախառն արտահայտություններն ու սպառնալիքները և, հայրենիքի շահերից մեկնելով, փորձել համաձայնության գալ թեկուզ ամենացավոտ հարցերում։
ՀԱԿ նախագահը գիտակցված սադրանք է անվանել Փաշինյանի կողմից Վաղարշապատում հավաք հրավիրելը, որն ուղղված է «ամբոխի միջոցով եկեղեցուն ճզմելուն»։
«Նա չի՞ գիտակցում արդյոք, որ եկեղեցու հետևորդները շատ ավելի բազմամարդ են, քան իր կողմնակիցները։ Անշուշտ՝ գիտակցում է, բայց նրա նպատակը հենց այդ ուժը ջախջախելն է՝ թերևս արժանանալու համար Ներոնի փառքին»,- հավելել է նախկին նախագահը։
Մայիսի 29-ից սկսած Փաշինյանը սոցիալական ցանցերում մի շարք գրառումներ էր արել Հայ Առաքելական եկեղեցու ներկայացուցիչների հասցեին, իսկ ավելի ուշ հանդես եկել նոր կաթողիկոս ընտրելու կոչով՝ կասկածի տակ դնելով նրա՝ կուսակրոնության ուխտի պահպանումը։ Փաշինյանը հուլիսի 8-ին հայտարարել էր, որ Մայր Աթոռ Սուրբ Էջմիածինը «զավթված է հակաքրիստոս, շնաբարո, ապազգային, ապապետական խմբակի կողմից»՝ հավելելով, որ պատրաստվում է Վեհարանի «ազատագրումն առաջնորդել անձամբ»։
Փաշինյանը հուլիսի 20-ին հայտարարել էր իր հետևորդների հետ Վաղարշապատի կենտրոնական հրապարակում «մեծ հոգևոր հանդիպման» մասին։ Մայր Աթոռը, ինչպես նաև Հայոց եկեղեցու պահպանության համահայկական խորհուրդը, վարչապետի հայտարարությունը որակել էին հակասահմանադրական։
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
