Իրանի Իսլամական Հանրապետության կառավարության խոսնակ Ֆաթիմա Մոհաջերանին հայտարարել է, որ Իրանը պատրաստ է շարունակել միջուկային բանակցություններն Ամերիկայի Միացյալ Նահանգների հետ, սակայն փոխադարձ հարգանքի հիման վրա, հայտնել է MEHR գործակալությունը։
Մամուլի ասուլիսում Մոհաջերանին ասել է, որ Իրանի նախագահ Մասուդ Փեզեշքիանի վարչակազմը վերջերս աշխարհին է փոխանցել միջուկային բանակցությունների պատրաստակամության մասին իր ուղերձը տարբեր ուղիներով, այդ թվում՝ դիվանագիտական հանդիպումների և հարցազրույցների միջոցով։
Պարբերականի փոխանցմամբ՝ խոսնակը հայտարարել է, որ երկիրը պատրաստ է շարունակել միջուկային բանակցություններն ԱՄՆ-ի հետ՝ փոխադարձ հարգանքի հիման վրա։
Իրանի գերագույն առաջնորդի միջազգային հարցերով խորհրդական Ալի Աքբար Վելայաթին հայտարարել էր, որ Թեհրանը չի համաձայնի բանակցել Վաշինգտոնի հետ, եթե ԱՄՆ-ն պահպանի Իրանի կողմից ուրանը հարստացնելուց հրաժարվելու պայմանը։ Իրանցի պաշտոնյան նշել էր, որ իրենք դեմ չեն ԱՄՆ-ի հետ բանակցություններին՝ առանց նախապայմանների։
Axios-ը, հղում անելով իր աղբյուրներին, ավելի վաղ հայտնել էր, որ Իսրայելը պատրաստվում է Իրանի դեմ հնարավոր նոր ռազմական գործողությունների, եթե Թեհրանը փորձի վերսկսել միջուկային ծրագիրը:
Իսրայելը հունիսի 13-ի գիշերը հարվածել էր Իրանին։ Նույն օրն Իրանը բալիստիկ հրթիռների կիրառմամբ պատասխան հարվածներ էր հասցրել Իսրայելին։ ԱՄՆ-ն հունիսի 22-ն, իր հերթին, հարվածներ էր հասցրել Իրանի երեք միջուկային օբյեկտի։ Հունիսի 23-ի ուշ երեկոյան Իրանը հրթիռներ էր արձակել Կատարում տեղակայված ամերիկյան ռազմաբազաների ուղղությամբ։ Մեկ օր անց՝ հունիսի 24-ին, ԱՄՆ նախագահը հայտնել էր, որ Թեհրանի և Թել Ավիվի միջև հրադադարն ուժի մեջ է մտել։
