Քաղաքագետ Հրանտ Միքայելն Armenia Today-ի «Խոսում ենք գլխավորի մասին» հաղորդմանը վերլուծել է Իսրայելի կողմից Իրանի վրա հարձակման հնարավոր ազդեցությունն ու ռիսկերը Հայաստանի վրա։
Միքայելյանն այս համատեքստում պատահական չի համարել հունիսի 13-ից Նախիջևանում մեկնարկած թուրք-ադրբեջանական զորավարժությունները և չի բացառել, որ Ադրբեջանը կարող է օգտվել տարածաշրջանային իրավիճակից ու Հայաստանից նոր զիջումներ պահանջել։
«Ադրբեջանը տարեսկզբին հայտարարել էր, որ Հայաստանը ֆաշիստական պետություն է, որի «դեմը պետք է առնել»։ Մենք նաև տեսնում ենք, որ Ադրբեջանում, ինչպես նաև օկուպացված Արցախի տարածքում, ռազմական ենթակառուցվածքներ են ստեղծում»,- նշել է քաղաքագետը։
Միքայելյանը շեշտել է նաև այն փաստը, որ Ադրբեջանն իր տարածքից վռնդել է միջազգային կառույցների, ԶԼՄ-ների ներկայացուցիչներին։
«Ցանկացած տեսանկյունից՝ Ադրբեջանը Հայաստանի դեմ պատերազմի է պատրաստվում։ Այդ միջոցով Ադրբեջանը կարող է Հայաստանի իշխանություններին ստիպել իր պայմաններով առաջ շարժվել։ Տեղեկություն կա, ըստ որի՝ Փաշինյանը հունիսի 20-ին պետք է Անկարա գնա։ Սա գուցե կապված է այն հանգամանքի հետ, որ թուրքական և ադրբեջանական կողմերն արդեն գիտեին Իրանի վրա հարձակման մասին, ու չի բացառվում՝ Փաշինյանին ասեն՝ «մեզ չլսելու տարբերակ չունես»։ Օրինակ՝ կարող են Ադրբեջանը Նախիջևանին կապող միջանցքի անցկացում պարտադրել, իսկ Փաշինյանը չի արել այնպիսի բան, որ իր հետ չկարողանան նման ձևով խոսել»,- նկատել է քաղաքագետը։
Նրա խոսքով՝ Հայաստանը մի իրավիճակում է, երբ Ադրբեջանը յուրաքանչյուր օր կարող է ուժի սպառնալիքով խոսել։
«Ադրբեջանը կարող է պահից օգտվել և Հայաստանից նոր զիջումներ պահանջել, քանի որ Բաքուն չի ցանկանում կնքել, այսպես կոչված, խաղաղության պայմանագիր։ Ադրբեջանը նաև տեսնում է, որ այժմ շատ խոցելի է զսպման մեխանիզմը․ մի կողմից Ռուսաստանն զբաղված է, մյուս կողմից՝ Իրանն իր խնդիրներն ունի։ Ռուս-ուկրաինական պատերազմից հետո Ադրբեջանի ագրեսիան աճեց, հիմա կարող ենք տեսնել նույնն Իրանի պարագայում։ Եթե Իրանը խճճվի պատերազմում, չկարողանա այլևս պատասխանել Իսրայելին, Ադրբեջանի կողմից Հայաստանի վրա հարձակումը չեմ բացառում»,- շեշտել է Միքայելյանը։
Քաղաքագետը հիշեցրել է, որ ՌԴ-ն Կապանում ուզում էր հյուպատոսություն բացել, ինչը, նրա խոսքով, Հայաստանի իշխանություններն, ըստ էության, մերժեցին։
«Հյուպատոսությունը զսպման մեխանիզմ կլիներ Ադրբեջանի համար»,- ընդգծել է Միքայելյանը։
Իսրայելը հունիսի 12-ի լույս 13-ի գիշերը հարվածել էր Իրանին։ Նույն օրն Իրանը բալիստիկ հրթիռների կիրառմամբ պատասխան հարվածներ էր հասցրել Իսրայելին։ ՀՀ ԱԳՆ-ն դատապարտել էր Իսրայելի հարձակումն Իրանի վրա։
Կարդացեք նաև՝
Փորձագետները գնահատել են Հայաստանի հնարավոր քայլերը` Իսրայելի կողմից Իրանի վրա հարձակման ֆոնին
