Իրանի միջուկային օբյեկտների ռմբակոծություններից հետո Հայաստանի հարավում ռադիոակտիվ ֆոնի փոփոխություն չկա, հայտնել է Միջուկային և ռադիացիոն անվտանգության գիտատեխնիկական կոնտրոնը։
Ըստ հրապարակման՝ Իրանի միջուկային օբյեկտների ռմբակոծություններից հետո կենտրոնի մասնագետները շտապ մեկնել են Սյունիքի մարզ՝ դոզիմետրիկ չափումներ իրականացնելու նպատակով։
«Չափումները կատարվել են մի շարք բնակավայրերում, այդ թվում՝ Մեղրի, Ագարակ և Քաջարան համայնքներում։ Այս պահին Հայաստանի հարավային շրջաններում բնական ռադիոակտիվ ֆոնի որևէ փոփոխություն չի արձանագրվել»,- ասված է հրապարակման մեջ։
Միջուկային և ռադիացիոն անվտանգության գիտատեխնիկական կենտրոնից հավաստիացրել են, որ շարունակում են իրականացնել իրավիճակի մշտական մոնիթորինգ։
Իրանը հունիսի 13-ին բալիստիկ հրթիռների կիրառմամբ հարվածներ էր հասցրել Իսրայելին՝ ի պատասխան Թել Ավիվի՝ ավելի քան 200 կործանիչի կիրառմամբ հունիսի 13-ի գիշերվա հարձակման, որի հետևանքով իրանցի բարձրաստիճան զինվորականներ են զոհվել: ՀՀ ԱԳՆ-ն դատապարտել էր Իսրայելի հարձակումն Իրանի վրա։
