ԱԺ Պաշտպանության և անվտանգության մշտական հանձնաժողովում գումարի դիմաց կարճատև զինծառայություն անցնելու թեմայով օրինագծի 4 ժամ տևած դռնփակ քննարկման ժամանակ՝ մայիսի 29-ին, «Քաղաքացիական պայմանագրի» (ՔՊ) ներկայացուցիչները հայտարարել են, որ օրինագիծը կխորացնի սոցիալական անարդարությունը, գրել է «Ժողովուրդ» օրաթերթը՝ հղում անելով ԱԺ-ում իր աղբյուրներին։
Ըստ թերթի՝ քննարկմանը մասնակցել են բոլոր իշխանական պատգամավորները, իսկ նրանցից 40-ը հերթագրվել են Պաշտպանության նախարար Սուրեն Պապիկյանին ու ՔՊ-ական պատգամավոր, նախագծի հեղինակ Հայկ Սարգսյանին հարց ուղղելու համար։
Թերթի փոխանցմամբ՝ քննարկումն արդյունք չի տվել, և եթե նախագիծն առանց փոփոխության բերվի, իշխող խմբակցությունը պատրաստվում է դեմ քվեարկել դրան։
«Հրապարակ» օրաթերթի տեղեկությամբ՝ խմբակցությունում առաջարկել են քվեարկություն իրականացնել, սակայն Սարգսյանը դեմ է արտահայտվել՝ ասելով, որ չի պատրաստվում նախագծից հրաժարվել։ Պատգամավորներն ու նախարարը վերջնական եզրահանգման չեն եկել, հավելել է թերթը։
Մայիսի 22-ին կառավարությունը հավանություն էր տվել Սարգսյանի նախագծին, ըստ որի՝ ովքեր ցանկանում են ծառայել 24 ամսից քիչ, կարող են որոշակի գումար վճարել պետբյուջե։ Մեկ ամսվա ծառայության դեպքում վճարը կլինի 24 մլն դրամ (62,5 հազար դոլար), իսկ 4 ամսվա ծառայության համար՝ 18 մլն դրամ (46,8 հազար դոլար)։
