Հայաստանը Կիպրոսին առաջարկել է համագործակցության աստիճանը բարձրացնել ռազմավարական գործընկերության աստիճանի, Կիպրոսի Ներկայացուցիչների պալատի նախագահ Անիտա Դիմիտրիուի հետ համատեղ մամուլի ասուլիսի ժամանակ հայտարարել է Հայաստանի ԱԺ նախագահ Ալեն Սիմոնյանը:
Նա նշել է, որ Դիմիտրիուն դրական է արձագանքել այս առաջարկին։ Սիմոնյանի խոսքով՝ կողմերը քննարկել են երկու երկրների համագործակցությունը տարբեր միջազգային հարթակներում և երկկողմ հարաբերություններին առնչվող մի շարք հարցե։: Նա ընդգծել է, որ Կիպրոսի Ներկայացուցիչների պալատի նախագահը Հայաստանի «ամենավառ արտահայտված» ընկերներից է միջազգային հարթակներում:
«Այն միջազգային հարթակներում, որտեղ իմ գործընկերը ներկայացված է, ունենք երկու խոսափող, ինչի համար տիկին Դիմիտրիուին և մեր բարեկամ Կիպրոսին շատ շնորհակալ եմ: Հայաստանը նույնպես մշտապես Կիպրոսի և Կիպրոսի ժողովրդի կողքին է»,- շեշտել է ԱԺ նախագահը:
Դիմիտրիուն, իր հերթին, նշել է, որ լիակատար աջակցում է Հայաստանի և Եվրամիության միջև հարաբերությունների խորացմանը, որովհետև «Հայաստանը պատկանում է ԵՄ-ին»։
«Վերահաստատում եմ իմ ընկեր Սիմոնյանին, որ ամեն կերպ կաջակցենք այս ընթացքին և այդ նախաձեռնությանը։ Մենք ձեր կողքին ենք՝ դեպի Եվրոպա ձեր ճանապարհին»,- հայտնել է նա։
Նա նշել է, որ Հայաստանն ու Կիպրոսը կիսում են նույն արժեքները, նույն սկզբունքները և տարիներ շարունակ պայքարում են նույն արդարության համար։ Նա նաև կիսվել է Արցախից բռնի տեղահանված քաղաքացիների հետ հանդիպման իր տպավորություններով և նշել, որ պատրաստ են աջակցել նրանց՝ իրենց կյանքը վերականգնելու ճանապարհին։
«Եվրոպան և միջազգային կառույցները չպետք է առաջնորդվեն երկակի ստանդարտներով։ Չպետք է մոռանանք, թե ինչ է տեղի ունեցել Հայաստանում։ Պետք է ունենանք հստակ արձագանք՝ հիմնված արդարության վրա»,- ընդգծել է Դիմիտրիուն։
2024 թվականի դեկտեմբերին Հայաստանը, Կիպրոսն ու Հունաստանը ստորագրել էին պաշտպանության համագործակցության 2025-ի ծրագրերը։
