ՀՀ վարչապետ Նիկոլ Փաշինյանը և Ֆրանսիայի նախագահ Էմանուել Մակրոնը Տիրանայում կարևորել են Հայաստան-Ադրբեջան խաղաղության համաձայնագրի ստորագրումը և այդ ուղղությամբ շարունակական ու հետևողական քայլերի իրականացումը, հայտնում է կառավարության մամուլի ծառայությունը։
Մակրոնն ընդգծել է Ֆրանսիայի աջակցությունը խաղաղ գործընթացին՝ նշելով, որ կայունությունն ու անվտանգությունը Հարավային Կովկասում կենսական նշանակություն ունեն ընդհանուր տարածաշրջանային համագործակցության համար:
Նշվում է, որ կողմերը բարձր են գնահատել Հայաստան-Ֆրանսիա հարաբերությունների դինամիկ զարգացումը, մտքեր փոխանակել նաև Հայաստան-Եվրոպական միություն հարաբերությունների հետագա խորացման վերաբերյալ:
Այսօօր ավելի վաղ Ֆրանսիայի նախագահն աջակցություն էր հայտնել խաղաղության համաձայնագրի ստորագրմանն ուղղված Հայաստանի և Ադրբեջանի ջանքերին։
Մայիսի 15-ին Ալբանիայի մայրաքաղաք Տիրանայում հանդիպել էին Հայաստանի վարչապետն ու Ադրբեջանի նախագահ Իլհամ Ալիևը։ Երկու երկրների ղեկավարները կարևորել էին Հայաստան-Ադրբեջան խաղաղության համաձայնագրի տեքստի համաձայնեցումը։
Մայիսի 15-ին Փաշինյանն ադրբեջանցի լրագրողին տված հարցազրույցում հայտարարել էր, որ Բաքվում կան շրջանակներ, որոնք ձգտում են հակամարտությունը տեղափոխել Հայաստանի տարածք: Նա հիշեցրել էր, որ հայկական կողմն առաջարկում է միաժամանակ ստորագրել խաղաղության պայմանագիր և ԵԱՀԿ-ին ուղղված համատեղ հայտարարություն՝ Մինսկի խմբի կառույցները լուծարելու մասին:
Մարտի 13-ին Ադրբեջանի ԱԳ նախարար Ջեյհուն Բայրամովը հայտարարել էր, որ խաղաղության պայմանագրի տեքստի շուրջ բանակցությունների գործընթացն արդեն ավարտված է։ Պաշտոնական Երևանը հաստատել էր նախագծի հաստատման ավարտը, ավելին՝ հայտարարել, որ պատրաստ է Բաքվի հետ սկսել խորհրդակցություններ համաձայնագրի ստորագրման ժամկետների և վայրի շուրջ։
