ԱԺ «Հայաստան» դաշինքի պատգամավոր Լևոն Քոչարյանի փաստաբան Էրիկ Ալեքսանյանը դիմել է ՀՀ գլխավոր դատախազին և ՀՀ քննչական կոմիտեի նախագահին՝ պահանջելով պարզաբանել, թե ի՞նչ փուլում է Քոչարյանի՝ տուժողի կարգավիճակով գործը։
Ըստ փաստաբանի՝ 2024 թվականի սեպտեմբեր ամսից մինչ օրս ոստիկանները պատասխանատվության չեն ենթարկվել։ Ընդ որում՝ Քննչական կոմիտեի նախագահն ԱԺ նիստի ժամանակ հայտնել է, որ նմանատիպ գործերի դեպքում գործուն քայլեր անելու համար կարևոր նշանակություն ունի հենց դատաբժշկական եզրակացությունը, որը, ըստ Ալեքսանյանի, Քոչարյանի դեպքում առկա է: Նրա պնդմամբ՝ ակնհայտ է, որ այս մոտեցումն անտեսվում է պատգամավորի գործի դեպքում և «զավեշտալի ձևով փորձ է կատարվում ներկայացնել իրողությունն այնպես, թե իբր Քոչարյանի մարմնի վրա առկա բռնի հետքերն առաջացել են ինքնավնասման պայմաններում»։
Մարտի 7-ին դատարանը որոշել էր Քոչարյանի նկատմամբ երկրից բացակայելու արգելքի մասին խափանման միջոցը թողնել անփոփոխ: Քոչարյանի փաստաբան Ալեքսանդր Կոչուբաևը հայտարարել էր, որ մտադիր են խափանման միջոցը գրավով փոխարինելու միջնորդություն ներկայացնել:
Քոչարյանը ձերբակալվել էր սեպտեմբերի 23-ին՝ բողոքի ցույցերի ժամանակ (ոստիկանները հաղորդում էին ներկայացրել, որ նա 4 կարմիր բերետավորի է ծեծել)։ Սեպտեմբերի 25-ին Քոչարյանը մեկ ամսով կալանավորվել էր: Հոկտեմբերի 16-ին վերջինիս կալանքը երկարացնելու միջնորդություն էր ներկայացվել։ Հոկտեմբերի 19-ին ընդդիմադիր գործչի կալանքը երկու ամսով երկարաձգվել էր։
Նոյեմբերի 6-ին նա ազատվել էր կալանքից, քանի որ ԿԸՀ-ի որոշմամբ՝ պատգամավորական մանդատ էր ստացել։ Քոչարյանը նոյեմբերի 14-ից ԱԺ պատգամավոր է: Փետրվարի 6-ին Քոչարյանի գործով մեղադրանք էր առաջադրվել նաև Սերգեյ Ասատուրովին:
