Ռուսաստանի ԱԳՆ պաշտոնական ներկայացուցիչ Մարիա Զախարովան մեկնաբանել է ՀՀ Ազգային ժողովի նախագահ Ալեն Սիմոնյանի հայտարարությունները, թե Ռուսաստանը «հիբրիդային պատերազմ» է վարում Հայաստանի դեմ։ Այդ մասին նա խոսել է ճեպազրույցի ժամանակ, որն ուղիղ հեռարձակել է ArmeniaToday-ը:
Նրա խոսքով՝ նման հայտարարությունները «բարենպաստ ֆոն չեն ստեղծում բարձր մակարդակի հանդիպումների համար»։
«Մեղմ ասած՝ Ալեն Սիմոնյանի հռետորաբանությունն ափսոսանք է առաջացնում, այդ բոլոր հարձակումներն ու վիրավորանքները»,- նշել է Զախարովան։
Նրա խոսքով՝ «հիբրիդային պատերազմի» մասին խոսք լինել չի կարող, քանի որ Հայաստանի ղեկավարությունը հրավիրված է Մոսկվայում անցկացվող Հաղթանակի շքերթին, իսկ երկրների միջև շփումները պահպանվում են տարբեր մակարդակներում։ Զախարովայի կարծիքով՝ Սիմոնյանի արտահայտություններն «արևմտյան մեթոդաբանության դրսևորումն» են։
Ռուս դիվանագետը մեկնաբանել է նաև Հայաստանի վարչապետ Նիկոլ Փաշինյանի հնարավոր մասնակցությանը Մոսկվայում մայիսի 9-ին կայանալիք Հաղթանակի շքերթին։ Նա հիշեցրել է, որ Փաշինյանը, ինչպես նաև շատ այլ ղեկավարներ, հրավիրված են, սակայն նախատեսում է գալ, թե ոչ, ինքը չի կարող ասել:
Սիմոնյանը մայիսի 5-ին չէր բացառել, որ Փաշինյանը վերջին պահին կարող է փոխել իր որոշումը Հաղթանակի շքերթին մեկնելու վերաբերյալ: Վարչապետի աշխատակազմը, ի պատասխան լրատվամիջոցի հարցմանը Փաշինյանի մոսկովյան այցի մանրամասների վերաբերյալ, հայտնել էր, որ «վարչապետի բոլոր այցերի վերաբերյալ տրամադրվում է ժամանակին և պատշաճ տեղեկատվություն»։
ՌԴ ԱԳՆ խոսնակն անդրադարձել է նաև Երևանի ավագանու «Հանրապետություն» խմբակցության մի շարք ներկայացուցիչների մեղադրանքներին, թե Նոր Նորքի թաղապետարանում տեղի ունեցած ծեծկռտուքը Ռուսաստանի դեսպանատան կողմից հրահրված սադրանք է։
«Ինձ թվում է՝ սա ներքաղաքական խնդիրներն արտաքին գործոնների միջոցով լուծելու փորձ է։ Պատասխանը պետք է այդ ուղղությամբ փնտրել։ Մենք չենք խառնվում ինքնիշխան պետություններում ընտրություններին»,- վստահեցրել է Զախարովան։
Ապրիլի 30-ին, երբ ակտիվիստ Արթուր Չախոյանն այցելել էր Նոր Նորքի թաղապետարան, ծեծկռտուք էր տեղի ունեցել վարչական շրջանի ղեկավարի, նրա աջակիցների և Չախոյանի միջև, որից հետո վերջինիս ոստիկանությունից վնասվածքներով տեղափոխել էին հիվանդանոց, այնուհետ՝ մեղադրանք առաջադրել։
ՔԿ խոսնակը մայիսի 1-ին տեղեկացրել էր, որ դեպքի առնչությամբ հանրային քրեական հետապնդում էր հարուցվել 4 անձի նկատմամբ, այդ թվում՝ Չախոյանի՝ մի խումբ անձանց կողմից ֆիզիկական ներգործության հատկանիշներով։
