Ադրբեջանի իշխանությունները կփորձեն օգտագործել Իրանի նախագահ Մասուդ Փեզեշքիանի Բաքու կատարած այցը հակահայկական նպատակներով, հայտարարել է իրանագետ Վարդան Ոսկանյանը։
«Այս այցը գրեթե ոչինչ չի փոխելու երկկողմ խնդիրների այն բարդ հանգույցում, որոնք, ըստ էության, բազմաթիվ կետերում անլուծելի են»,- գրել է փորձագետը։
Ոսկանյանը կարծում է, որ Թեհրանի դիրքորոշման մեջ փոփոխություն կամ մեղմացում չի կարող լինել այսպես կոչված՝ «Զանգեզուրի միջանցքի» հարցում, քանի որ դա ուղղակիորեն հակասում է իսլամական պետության շահերին։
Իրանագետը կեղծ է անվանել Բաքվի կողմից առաջ քաշվող այն թեզը, որ հայկական Սյունիքով միջանցք չտրամադրելու դեպքում Նախիջևանի հետ ցամաքային կապը կիրականացվի Իրանի տարածքով։ Նրա խոսքով՝ դա ճնշման պրիմիտիվ գործիք է Երևանի վրա, քանի որ այդ հաղորդակցությունը ԽՍՀՄ փլուզումից ի վեր իրականացվել է հենց Իրանի տարածքով՝ «իրանական լիակատար վերահսկողության, իսկ անհրաժեշտության դեպքում նաև սահմանափակումների ներքո»։
Հայաստանում Իրանի դեսպան Մեհդի Սոբհանին փետրվարի 6-ին հայտարարել էր, որ «Զանգեզուրի միջանցքը» վնաս է թե՛ Հայաստանի, թե՛ Իրանի շահերին: Նա հավելել էր, որ Իրանն ու Հայաստանը համակարծիք են այս հարցում, և տարածաշրջանում միայն Թեհրանն է աջակցում Երևանին ապաշրջափակման վերաբերյալ այդ մոտեցմամբ։
