Վարդան Ղուկասյանը երդում տվեց և ստանձնեց Գյումրու ղեկավարի պաշտոնը։ Երդմնակալության արարողությունն սկսվեց աղոթքով, ապա հնչեց Հայաստանի հիմնը, որից հետո նորընտիր քաղաքապետը բարձրացավ ամբիոն։ Միջոցառումը հեռարձակվել է Armenia Today-ի կողմից։
«Ստանձնելով Շիրակի մարզի Գյումրի քաղաքի ղեկավարի պաշտոնը՝ երդվում եմ իմ լիազորություններն իրականացնելիս պահպանել Սահմանադրությունը, Հայաստանի օրենքները և ավագանու որոշումները, ազնվորեն և բարեխղճորեն կատարել քաղաքապետի պարտականությունները՝ ի շահ քաղաքի բարգավաճման և գործելով նրա բնակիչների բարօրության։ Ես պարտավորվում եմ պաշտպանել քաղաքի իրավունքները, օրինական շահերը և սեփականությունը, ամբողջ ուժով աջակցել ժողովրդի հավատին և նպաստել նրանց նյութական բարեկեցությանը և հոգևոր վերելքին»,- ասաց Ղուկասյանը։
Երդմնակալության արարողությանը ներկա էր Հայ Առաքելական Եկեղեցու Շիրակի թեմի առաջնորդ, արքեպիսկոպոս Միքայել Աջապահյանը։
Ղուկասյանը Գյումրիի քաղաքապետ էր ընտրվել ապրիլի 16-ին։ Գյումրիի ընտրություններին մասնակցող «Իմ հզոր համայնք» կուսակցության և «Մայր Հայաստան» դաշինքի ներկայացուցիչները մարտի 31-ին հայտարարել էին իրենց ձայները Ղուկասյանին տալու որոշման մասին, ինչի արդյունքում իշխող ՔՊ-ն զրկվել էր մեծամասնություն կազմելու հնարավորությունից, քանի որ 50 տոկոսից ավելի ձայներ չէր հավաքել։ Ընտրություններից 6 օր անց՝ ապրիլի 4-ին, իր ձայները Ղուկասյանին տալու մասին էր հայտնել նաև «Մեր քաղաքը» դաշինքի ցուցակը գլխավորող ԱԺ պատգամավոր Մարտուն Գրիգորյանը։
