ՌԴ ԱԳՆ պաշտոնական ներկայացուցիչ Մարիա Զախարովան հայտնել է, որ մինչև 2025 թվականի մայիս հայտնի կդառնան Սյունիքի մարզի Կապանում ՌԴ գլխավոր հյուպատոսության բացման կոնկրետ ժամկետները։ Այս մասին Զախարովան խոսել է ԱԳՆ-ի ամենշաբաթյա ճեպազրույցում։
«Դրա բացումը զգալի խթան կլինի առևտրային և ներդրումային համագործակցության խորացման և այս տարածքի և Ռուսաստանի տարածաշրջանների միջև կապերի հաստատման համար»,- նշել է Զախարովան։
Բանախոսը հավելեց, որ բացումն իրականացնում է «ռուս դիվանագետների առաջադեմ խումբը»։ Նրա խոսքով, այս խմբի աշխատանքը հունվարին և մարտին քննարկվել է Ռուսաստանի և Հայաստանի արտգործնախարարությունների ղեկավարների կողմից Մոսկվայում։
2023 թվականի նոյեմբերին ՌԴ կառավարությունը հավանություն էր տվել ՀՀ Սյունիքի մարզի Կապան քաղաքում գլխավոր հյուպատոսություն բացելու համաձայնագրին։ Ակնկալվում էր, որ հյուպատոսությունը կբացվի 2024 թվականի սկզբին, սակայն գործընթացը հետաձգվել է։
