Հայաստանի հետ Թուրքիայի հարաբերությունների կարգավորումը կախված է նրանից, թե արդյոք Երևանը կկատարի Բաքվի պահանջները, ասել է Էրդողանի խորհրդական Չաղրի Էրխանը, հայտնում են ադրբեջանական լրատվամիջոցները։
«Դեպի նոր աշխարհակարգ» թեմայով քաղաքական ֆորումում Էրխանն ընդգծել է, որ Անկարայի և Երևանի միջև հարաբերությունների կարգավորումը հնարավոր է, եթե Հայաստանը ճանաչի «Ադրբեջանի անկախությունը, տարածքային ամբողջականությունը և ինքնիշխանությունը և ստորագրի խաղաղության պայմանագիր»։
Հայաստանի վարչապետ Նիկոլ Փաշինյանը մարտի 26-ին ասել էր, որ Հայաստանը «իրոք պատրաստ է» խաղաղության պայմանագիր կնքել Բաքվի հետ։ Վարչապետը նշել էր, որ նման հայտարարություն պետք է արվի նաև Ադրբեջանից։
Մարտի 13-ին Ադրբեջանի ԱԳՆ-ն հայտարարել էր Երևանի և Բաքվի միջև խաղաղության պայմանագրի տեքստի շուրջ բանակցությունների ավարտի մասին։ Հայաստանի ԱԳՆ-ն հաստատել էր լուրը և հայտարարել, որ Երևանը պատրաստ է Բաքվի հետ քննարկել համաձայնագրի ստորագրման ժամկետները և վայրը։ Վարչապետ Նիկոլ Փաշինյանը մանրամասնել էր Երևանի և Բաքվի միջև խաղաղության պայմանագրի երկու կետերի բովանդակությունը և հաստատել, որ հարցերը վերաբերում էին հայ-ադրբեջանական սահմանին երրորդ երկրների ներկայացուցիչների բացակայության դրույթին, ինչպես նաև միջազգային դատարաններում հայցերը հետ կանչելու խնդրին։ Մարտի 13-ին Ադրբեջանի նախագահ Իլհամ Ալիևը հայտարարել էր, որ Բաքվի վստահության մակարդակը Հայաստանի նկատմամբ «մոտ է զրոյին»։
