Կենտրոնական ընտրական հանձնաժողովն ամփոփել է մարտի 30-ին Գյումրիում և Փարաքարում տեղի ունեցած ՏԻՄ ընտրությունների վերջնական արդյունքները, որոնցով Գյումրիում «Քաղաքացիական պայմանագիրն» ստացել է 17 188 քվե (14 մանդատ), Հայաստանի Կոմունիստական կուսակցությունը 9727 քվե (8 մանդատ), հայտնել են ԿՀԸ-ից։
ԿԸՀ տվյալներով՝ «Մայր Հայաստան» կուսակցությունների դաշինքը Գյումրիում ստացել է 2904 քվե (2 մանդատ), «Մեր քաղաքը» կուսակցությունների դաշինքը՝ 7380 քվե (6 մանդատ), «Իմ հզոր համայնք» կուսակցությունը՝ 3739 քվե (3 մանդատ)։
Փարաքարում ՔՊ-ն ստացել է 3669 քվե (7 մանդատ), «Միասնություն» կուսակցությունների դաշինքը՝ 6508 քվե (12 մանդատ), «Ազգային առաջընթաց» կուսակցությունը՝ 900 քվե (2 մանդատ)
ԿԸՀ-ից տեղեկացրել են, որ ընտրական իրավունք ունեցող 111 236 քաղաքացուց Գյումրի համայնքի ավագանու արտահերթ ընտրություններին մասնակցել է 47 434 ընտրող։ Փարաքարում 20 967 ընտրողից քվեարկությանը մասնակցել է 11 528-ը։
«Իմ հզոր համայնք» կուսակցության և «Մայր Հայաստան» դաշինքի ներկայացուցիչները մարտի 31-ին՝ ընտրություններից հետո, հայտարարել էին իրենց ձայները Հայաստանի Կոմունիստական կուսակցությանը քաղաքապետի թեկնածու Վարդան Ղուկասյանին տալու որոշման մասին, ինչի արդյունքում իշխող ՔՊ-ն կզրկվի առաջատարի դիրքերից, քանի որ 50+ ձայներ չի հավաքել։ Ընտրություններից 6 օր անց՝ ապրիլի 4-ին, իր ձայները Ղուկասյանին տալու մասին էր հայտարարել նաև «Մեր քաղաքը» դաշինքի թեկնածու Մարտուն Գրիգորյանը։
