Ցանկացած ռազմական միջամտություն ռիսկեր է ստեղծում ամբողջ տարածաշրջանի համար, Reuters-ին հայտարարել է Թուրքիայի արտգործնախարար Հաքան Ֆիդանը` մեկնաբանելով Սիրիայի թիրախներին Իսրայելի հարվածները։
«Սիրիայում ռազմական օբյեկտներին իսրայելական շարունակվող հարվածները խաթարում են Դամասկոսի նոր կառավարության կարողությունը՝ արդյունավետորեն արձագանքելու անվտանգության սպառնալիքներին և կարող են հանգեցնել տարածաշրջանի հետագա ապակայունացման», – Ֆիդանի խոսքերը մեջբերում է գործակալությունը։
Նրա խոսքով՝ Իսրայելի գործողությունները վնասում են ոչ միայն Սիրիային, այլև Մերձավոր Արևելքի անվտանգության ընդհանուր ճարտարապետությանը։ Նա նշել է, որ Սիրիայի նոր կառավարությունը՝ նախագահ Ահմեդ ալ-Շարաայի գլխավորությամբ, Թուրքիայի մերձավոր դաշնակիցն է, և որ նրա լեգիտիմությունը հիմնված է հանրային լայն աջակցության և երկար տարիների հակամարտությունից հետո երկիրը կայունացնելու պարտավորության վրա։
Պատասխանելով Իրանի դեմ հնարավոր ռազմական հարվածների մասին ԱՄՆ նախագահ Դոնալդ Թրամփի վերջին հայտարարությունների մասին հարցին՝ Ֆիդանն ընդգծել է, որ Իրանի հասցեին ցանկացած սպառնալիք լուրջ անհանգստություն է առաջացնում Անկարայում։ Նա հայտարարել է, որ հակամարտությունը լուծելու միակ ընդունելի ճանապարհը դիվանագիտական ջանքերն են, և որ Թուրքիան կտրականապես դեմ է Իրանի դեմ ցանկացած զինված ագրեսիայի, որի հետ ունի ընդհանուր սահման և բարդ, բայց կայուն քաղաքական և տնտեսական հարաբերություններ։
Ավելի վաղ արևմտյան ԶԼՄ-ներում նոր հրապարակումներ էին հայտնվել Իրանին ԱՄՆ-ի և Իսրայելի հարվածների հնարավորության մասին։ Daily Express թերթը, վկայակոչելով ԱՄՆ նախագահ Դոնալդ Թրամփի վարչակազմին մոտ կանգնած աղբյուրին, հայտնել էր, որ «Իրանի ժամանակն սպառվում է»։ Հրատարակությունը նշել էր, որ «եթե նա չպատասխանի նախագահ Թրամփի պայմաններին՝ իր միջուկային հնարավորությունների ամբողջական աուդիտ թույլ տալու և ապամոնտաժելու դիմաց, Իրանը կվերանա մինչև սեպտեմբեր»։
Կարդացեք նաև՝
Թուրքիան միշտ Հայաստանի դեմ գործելու ժամանակ ու ռեսուրս ունի. Ռուբեն Մելքոնյան։
