Freedom House միջազգային իրավապաշտպան կազմակերպությունը կդադարեցնի իր գործունեությունը Հայաստանում, հայտնել է կազմակերպության ներկայացուցիչ Անդրանիկ Շիրինյանը։ Նա չի նշել կազմակերպության գործունեության դադարեցման պատճառները։
Freedom House-ը շահույթ չհետապնդող կազմակերպություն է, որի կենտրոնակայանը գտնվում է Վաշինգտոնում: Ֆինանսավորման հիմնական մասն ստացվում է ԱՄՆ Պետդեպարտամենտի և այլ պետական դրամաշնորհներից:
Freedom House-ը 2024-ի ապրիլին իջեցրել էր Հայաստանի ազգային ժողովրդավարական կառավարման վարկանիշը 2,5 կետից մինչև 2,25՝ «գործադիր իշխանության ուժեղացման, կենտրոնական իշխանության կողմից իր լիազորությունները չարաշահելու, ընդդիմադիր քաղաքապետերին իմփիչմենթի ենթարկելու վաղեմի տենդենցի և իշխող կուսակցության ֆինանսների թափանցիկության բացակայության պատճառով»։
Իրավապաշտպան կազմակերպությունը մտահոգություն էր հայտնել Հայաստանում ոստիկանական բռնության դեպքերի աճի վերաբերյալ։ Մայիսին «Լրագրողներ առանց սահմանների» (RSF) իրավապաշտպան կազմակերպությունը հայտարարել էր Հայաստանում լրատվամիջոցների բևեռացման և լրագրողների նկատմամբ հետապնդումների մասին։
