Սահմանադրության նոր տեքստը գաղտնի չի լինելու և ինչ-որ պահի հանրայնացվելու է, հայտարարել է ՀՀ արդարադատության նախարար Սրբուհի Գալյանը։
«Ինչ վերաբերում է Սահմանադրության փոփոխությանը, ապա ես բազմիցս նշել եմ, որ մենք աշխատում ենք Սահմանադրության նոր տեքստի վրա։ Այս պահին տեքստի մասին մանրամասներ չեմ կարող հայտնել, բայց շատ կարևոր է մի շեշտադրում, որ այդ տեքստը չի լինելու և ի բնե չի կարող լինել գաղտնի»,- շեշտել է նա։
Նա նաև հայտարարել է, որ Սահմանադրության փոփոխությունը 2-3 ամսվա հարց չէ, դա բարդ աշխատանք է, որը պահանջում է երկար ժամանակ։
«Ես ժամկետներ նախորդիվ էլ եմ ասել, որ խոսքը 8-10 ամսվա մասին է, և չեմ կարծում, որ նոր Սահմանադրության տեքստ հնարավոր է այդ ժամկետից շուտ ունենալ»,- ընդգծել է Գալյանը։
Նրա խոսքով՝ Բաքվի պայմանները՝ լուծարել ԵԱՀԿ Մինսկի խումբն ու Սահմանադրությունը փոխել, չի դիտարկվում որպես Խաղաղության պայմանագրի ստորագրման նախապայման։
«Խաղաղությունն այլընտրանք չունի, և մեր գործողությունները պետք է միտված լինեն խաղաղության վերջնական հաստատմանը, բայց թե ինչ կոնցեպտով պետք է առաջ շարժվենք, շուտով հանությանը հայտնի կլինի»,- նշել է նախարարը։
Մարտի 13-ին Ադրբեջանի ԱԳՆ-ն հայտարարել էր Երևանի և Բաքվի միջև խաղաղության պայմանագրի տեքստի շուրջ բանակցությունների ավարտի մասին, հայկական կողմի վերջին երկու կետերի վերաբերյալ Բաքվի առաջարկները ընդունելուց հետո։ Հայաստանի ԱԳՆ-ն հաստատել էր լուրը և հայտարարել, որ Երևանը պատրաստ է Բաքվի հետ քննարկել համաձայնագրի ստորագրման ժամկետները և վայրը։
Վարչապետ Նիկոլ Փաշինյանը մանրամասնել էր Երևանի և Բաքվի միջև խաղաղության պայմանագրի երկու կետերի բովանդակությունը և հաստատել, որ հարցերը վերաբերում էին հայ-ադրբեջանական սահմանին երրորդ երկրների ներկայացուցիչների բացակայության դրույթին, ինչպես նաև միջազգային դատարաններում հայցերը հետ կանչելու խնդրին։ Մարտի 13-ին Ադրբեջանի նախագահ Իլհամ Ալիևը հայտարարել էր, որ Բաքվի վստահության մակարդակը Հայաստանի նկատմամբ «մոտ է զրոյին»։
