Իրանի արտաքին գործերի նախարար Սեյեդ Աբբաս Արաղչին հայտարարել է, որ Հարավային Կովկասի տարածաշրջանում էսկալացիայի վտանգ կա, քանի դեռ Երևանն ու Բաքուն խաղաղության պայմանագիր չեն ստորագրել։
«Հուսով ենք, որ խաղաղության պայմանագրի ստորագրմանը զուգահեռ՝ նվազագույնի կհասցվի էսկալացիայի վտանգը, և մենք ականատես կլինենք տարածաշրջանում կայունության, որը բխում է բոլորի շահերից»,- նշել է իրանցի դիվանագետը։
Արաղչին հույս է հայտնել, որ Հայաստանի և Ադրբեջանի միջև խաղաղության ճանապարհին առկա խնդիրները կլուծվեն, և համաձայնագիր կստորագրվի։
Հայաստանի ԱԳ նախարար Արարատ Միրզոյանն, իր հերթին, հայտարարել է, որ խաղաղության համաձայնագրի տեքստի համաձայնեցումից հետո Հայաստանն Ադրբեջանին առաջարկել է խորհրդակցություններ սկսել՝ փաստաթղթի ստորագրման օրն ու վայրը որոշելու նպատակով, սակայն այս պահին նման պատրաստակամություն պաշտոնական Բաքվից չեն տեսել։ Բացի այդ, Ադրբեջանը նախապայմաններ է առաջադրում պայմանագրի ստորագրման համար, հավելել է նախարարը։
«Պետք է շարունակենք աշխատել, բանակցել ու գտնել փոխընդունելի և երկարատև խաղաղություն ապահովող լուծումներ։ Այլընտրանք ուղղակի չկա։ Մենք պատրաստ ենք հնարավորինս արագ ներգրավվել այդ գործընթացին ու դնել մեր ստորագրությունը»,- ասել է նա։
Մարտի 13-ին Ադրբեջանի ԱԳՆ-ն հայտարարել էր Երևանի և Բաքվի միջև խաղաղության պայմանագրի տեքստի շուրջ բանակցությունների ավարտի մասին, հայկական կողմի վերջին երկու կետերի վերաբերյալ Բաքվի առաջարկները ընդունելուց հետո։ Հայաստանի ԱԳՆ-ն հաստատել էր լուրը և հայտարարել, որ Երևանը պատրաստ է Բաքվի հետ քննարկել համաձայնագրի ստորագրման ժամկետները և վայրը։
Վարչապետ Նիկոլ Փաշինյանը մանրամասնել էր Երևանի և Բաքվի միջև խաղաղության պայմանագրի երկու կետերի բովանդակությունը և հաստատել, որ հարցերը վերաբերում էին հայ-ադրբեջանական սահմանին երրորդ երկրների ներկայացուցիչների բացակայության դրույթին, ինչպես նաև միջազգային դատարաններում հայցերը հետ կանչելու խնդրին։
Մարտի 13-ին Ադրբեջանի նախագահ Իլհամ Ալիևը հայտարարել էր, որ Բաքվի վստահության մակարդակը Հայաստանի նկատմամբ «մոտ է զրոյին»։
