Հայտարարությունն այն մասին, որ Երևանը պետք է Ադրբեջանի դատարանին հանձնի այն հայ գործիչներին, որոնց Բաքուն հանցագործ է համարում, ըստ էության, խաղաղության պայմանագրի ստորագրման ևս մեկ նախապայման է, որն առաջ է քաշել Ադրբեջանը, գրել է ԱԺ «Պատիվ ունեմ» խմբակցության քարտուղար Տիգրան Աբրահամյանը։
Այսպես է նա մեկնաբանել Ադրբեջանի նախագահի օգնական Հիքմեթ Հաջիևի X-ում հրապարակումը, որով նա Երևանից պահանջում է պատասխանատվություն ստանձնել «ագրեսիայի», «օկուպացիայի» և «ռազմական հանցագործությունների» համար, ինչպես նաև Բաքվին հանձնել «Հայաստանի տարածքում թաքնված անձանց», որոնց Ադրբեջանի իշխանությունները ներկայացնում են որպես հանցագործ։
«Սա ևս մեկ անգամ ցույց է տալիս, որ Ադրբեջանի նպատակը Հայաստանի հետ հարաբերությունների կարգավորումը չէ, այլ քաղաքական քարտեզից վերջնական հեռացնելը»,- գրել է Աբրահամյանը։
Պատգամավորը հիշեցրեցրել է, որ Բաքվի «դատավարության» ընթացքում մեղադրանքներ են առաջադրվել ՀՀ երկրորդ և երրորդ նախագահներ Սերժ Սարգսյանին և Ռոբերտ Քոչարյանին, բազմաթիվ բարձրաստիճան ռազմական և քաղաքական գործիչների, ազգային-ազատագրական պայքարի ակտիվ մասնակիցներին։ Աբրահամյանը հավելել է, որ Ադրբեջանում շինծու մեղադրանքներից մեկում նշվում է Սարգսյանի անունը, ում դեմ քարոզարշավը նոր թափ է ստանում։
Մարտի 8-ին Հաջիևը Հայաստանի իշխանություններին մեղադրել էր Բաքվում Արցախի նախկին ղեկավարների դատավարությունների «քարոզչական» արշավի մեջ։ Նա Երևանին կոչ էր արել համագործակցել Ադրբեջանի հետ՝ «անցումային շրջանի արդարադատության վերականգնմանն ու տարածաշրջանում կայուն խաղաղության հաստատմանը նպաստելոու համար»։
