Հայաստանի և Ադրբեջանի միջև երկաթուղային հաղորդակցությունը վերականգնելու առաջարկին ի պատասխան՝ Երևանը դեռևս սպասում է Բաքվի պաշտոնական արձագանքին, լրագրողների հետ ճեպազրույցի ժամանակ հայտարարել է վարչապետ Նիկոլ Փաշինյանը։ Նա նաև համոզմունքն է հայտնել, որ տարածաշրջանում պատերազմի, էսկալացիայի նախադրյալ չկա։
Նշելով, որ առաջարկը վերաբերում է նաև Նախիջևանի և Ադրբեջանի հետ կապին, նա հիշեցրել է, որ Երևանը պատրաստ է իր տարածքով հաղորդակցության համար այնպիսի պայմաններ ապահովել, ինչ Իրանը տրամադրում է Ադրբեջանին։ Փաշինյանի խոսքով՝ հայկական կողմը պատրաստ է փոխադարձության սկզբունքով է՛լ ավելի պարզեցնել հաղորդակցության ռեժիմը։
«Մենք առաջարկել ենք լուծում և հույս ունենք, որ Ադրբեջանը դրական կարձագանքի այդ լուծմանը, որովհետև ես, ճիշտն ասած, շատ եմ վերլուծում և ուզում եմ հասկանալ, իսկ ինչո՞ւ պետք է Ադրբեջանը բացասական արձագանքի։ Իհարկե, ինձ իրավունք չեմ վերապահի Ադրբեջանի փոխարեն պատասխանել, բայց օբյեկտիվ վերլուծությունը ցույց է տալիս, որ դա մերժելու հիմքեր ուղղակի չկան»,- ասել է Փաշինյանը։
Վարչապետի խոսքով՝ հայկական կողմի առաջարկը լիովին ընդունելի կլինի Հայաստանի և Ադրբեջանի ժողովուրդների համար։
«Համոզված եմ, որ այդ թվում՝ Հայաստանի ժողովրդի համար, այդ թվում՝ Ադրբեջանի ժողովրդի համար մեր առաջարկած լուծումը կլինի 100%-ով ընդունելի։ Ես չեմ հրապարակայնացնում միայն, որպեսզի լրացուցիչ, այսպես ասած, լարվածություն չստեղծեմ թեմայի շուրջ, որ մենք առանց սպասելու Ադրբեջանի արձագանքին՝ հրապարակայնացրել ենք և կոռեկտության տրամաբանությունից դուրս ենք եկել»,- նշել է վարչապետը։
Նա ասել է, որ խաղաղության պայմանագրի նախագծի 17 հոդվածից երկուսը, որոնք վերաբերում են սահմանի երկայնքով երրորդ երկրների ուժերի տեղակայմանը և միջազգային ատյաններում իրավական և այլ վեճերին, մնում են չհամաձայնեցված։ Վարչապետը հայտնել է, որ մի քանի օր առաջ Հայաստանը Բաքվից ստացել է խաղաղության պայմանագրի նախագծի 12-րդ խմբագրությունը։ Նրա խոսքով՝ այս փաստն ինքնին խոսում է այն մասին, որ բանակցային գործընթացը փակուղում չէ, և այժմ հայկական կողմը պետք է ներկայացնի իր առաջարկները։
Փաշինյանը նաև հայտարարել է, որ տարածաշրջանում պատերազմի կամ էսկալացիայի համար հիմքեր, պատճառներ կամ նախադրյալներ չկան, քանի որ, ըստ նրա, տարածաշրջանային բոլոր խնդիրների լուծումներն առաջարկվել են։ Նա կրկնել է, որ Երևանը երբեք չի համաձայնել սահմանափակել իր ինքնիշխանությունը, իրավազորությունը և տարածքային ամբողջականությունը հաղորդակցությունների ապաշրջափակման համատեքստում։
Փաշինյանը ևս մեկ անգամ նշել է, որ խաղաղության պայմանագրի նախագծում չի նշվում Հայաստանի սահմանադրության փոփոխության կամ Ադրբեջանին միջանցք տրամադրելու մասին։
2024 թվականի դեկտեմբերի 19-ին Փաշինյանը հայտարարել էր, որ Հայաստանն սպասում է Ադրբեջանի դրական արձագանքին՝ երկու երկրների միջև երկաթուղային հաղորդակցությունն ապաշրջափակելու համար։ Փետրվարի 25-ին ՀՀ ԱԳՆ-ն հայտնել էր, որ Երևանն ստացել է խաղաղության պայմանագրի վերաբերյալ Ադրբեջանի պատասխանը, իսկ մյուս ուղղություններով առաջարկները՝ կապուղիների ապաշրջափակում և սպառազինությունների փոխադարձ վերահսկման ու վերիֆիկացիայի մեխանիզմ, դեռ մնում են անպատասխան։
