Երևանն ստացել է խաղաղության պայմանագրի վերաբերյալ Ադրբեջանի պատասխանը, «Լուրերին» հայտնել է ՀՀ ԱԳՆ մամուլի քարտուղար Անի Բադալյանը։
«Ստացել ենք խաղաղության պայմանագրի վերաբերյալ Ադրբեջանի պատասխանը, իսկ մյուս ուղղություններով առաջարկները՝ կապուղիների ապաշրջափակում և սպառազինությունների փոխադարձ վերահսկման ու վերիֆիկացիայի մեխանիզմ, դեռ մնում են անպատասխան»,- ասել է Բադալյանը։
Հունվարի 8-ին Armenia Today-ի հարցին ի պատասխան՝ Հայաստանի արտգործնախարար Արարատ Միրզոյանը հայտարարել էր, որ Բաքվում բացակայում է Երևանի հետ խաղաղություն հաստատելու ցանկությունը։ 2024 թվականի դեկտեմբերին Միրզոյանը հայտնել էր Ադրբեջանի հետ խաղաղության պայմանագրի ստորագրման և Բաքվի հետ համաձայնագրի նախագծի նախաբանի և 17 հոդվածներից 15-ի շուրջ առաջընթացի մասին։
2024 թվականի դեկտեմբերի 18-ին Ադրբեջանի նախագահ Իլհամ Ալիևը հայտարարել էր, որ կողմերը դեռ պետք է համաձայնեցնեն միջազգային դատարաններում փոխադարձ պահանջներից հրաժարվելու և Հայաստանի ու Ադրբեջանի սահմանին երրորդ երկրների ներկայացուցիչների տեղակայման արգելքի մասին դրույթները։
