«Դեմոկրատական այլընտրանք» կուսակցությունը Գյումրու ավագանու մարտի 30-ի արտահերթ ընտրություններում քաղաքապետի թեկնածու է առաջադրել Արտյոմ Ղարաղազարյանին, հայտնել է Ղարաղազարյանը։
Նրա խոսքով՝ Գյումրու ավագանու արտահերթ ընտրություններում իրենց թիմը բաղկացած է արդյունք ստեղծող, արարող մարդկանցից:
«Ամբողջ կյանքում արարել ենք, ստեղծել աշխատատեղեր, որոնց շնորհիվ գյումրեցին կառչած է մնում իր հողին: Ես և իմ թիմը, «Դեմոկրատական այլընտրանք» կուսակցությունը, արդար քրտինքով իր հացը վաստակող մարդկանց կողքին ենք, նրանց շահերի պաշտպանը»,- գրել է նա:
Թեկնածուն հավելել է, որ ունի Գյումրու զարգացման ծրագիր՝ «Ճիշտ քաղաք» անունով, որի բոլոր դրույթներն ընտրողներին հասանելի կդառնան առաջիկայում:
Փետրվարի 11-ին պրոդյուսեր, հասարակական գործիչ Ռուբեն Մխիթարյանը հայտարարել էր Գյումրու քաղաքապետի ընտրություններում առաջադրվելու իր որոշման մասին։ Փետրվարի 12-ին «Պատիվ ունեմ» խմբակցության անկուսակցական պատգամավոր Մարտուն Գրիգորյանն իր թեկնածությունն էր առաջադրել Գյումրու քաղաքապետի պաշտոնում։ Գյումրիի քաղաքապետի պաշտոնում առաջադրվելու մասին հայտնել էին նաև նախկին քաղաքապետ Վարդան Ղուկասյանը և գործարար Կարեն Սիմոնյանը։
2024 թվականի նոյեմբերի 26-ին վարչապետը հայտարարել էր Գյումրու քաղաքապետի պաշտոնակատարի թեկնածուին որոշելու համար նախնական ընտրություն անցկացնելու մասին։ Դեկտեմբերի 13-ին Փաշինյանը Սարիկ Մինասյանին Գյումրու ղեկավարի պաշտոնակատար էր նշանակել։ Գյումրու քաղաքապետ Վարդգես Սամսոնյանը 2024 թվականի հոկտեմբերի 28-ին հրաժարական էր տվել։ Միաժամանակ՝ հրաժարական էին տվել նաև «Բալասանյան» դաշինքի ավագանու անդամները։
