ԱԺ «Հայաստան» խմբակցության պատգամավորները, Երևանի ավագանու «Մայր Հայաստան» խմբակցության ներկայացուցիչներն ու Երևանի նախկին քաղաքապետ, «Նոր ուժ» կուսակցության նախագահ Հայկ Մարությանը միացել են տրանսպորտի նոր սակագնի բոյկոտին։
Նրանք քաղաքացիներին հորդորել են տրանսպորտի համար վճարել 100 դրամ և երթևեկել: Ըստ ցուցարարների՝ բարեփոխված ավտոբուսները կարելի է պահել 60 դրամ ինքնարժեքով, սակայն քաղաքապետարանը մեկ տոմսի արժեքը սահմանել է 150 դրամ։
Մարությանը կոչ է արել քաղաքացիներին չվճարել 150 դրամ, քանի որ «չհիմնավորված թանկացումը բերելու է նոր թանկացումների»։ Նա մտել է ավտոբուս, 100 դրամ դրել վարորդի մոտ ու նույն կերպ կոչ արել անել նստած ուղևորներին։
«Համոզված ենք, որ 100 դրամով հնարավոր է այս տրանսպորտը պահել։ Մասնավորապես, որ հայտարարեցին, որ թանկացնելու են տարեվերջին։ Երբ ժողովուրդը միասնական կլինի, մենք մեր ուզածին կհասնենք»,- ասել է նա։
«Հայաստան» խմբակցության պատգամավոր Գառնիկ Դանիելյանը նշել է, որ տրամադրությունները տարբեր են բնակիչների շրջանում։
«Մասիվից իջել ենք կենտրոն, քաղաքացիներին հորդորել ենք վճարել 100 դրամ։ Անկեղծ ասած՝ տրամադրությունները տարբեր են։ Մեծ մասը լուռ է, չի արտահայտվում։ Կան մարդիկ, որոնք իրավացիորեն իրենց դժգոհություններն են հայտնում այս թանկացումներից։ Նաև պետք է խոստովանեմ, որ մարդ էլ կա, որ հաշտ է այս իրականության հետ»,- ասել է նա։
Նույն խմբակցության պատգամավոր Թադևոս Ավետիսյանը պատմել է, որ իր ավտոբուսում տարեցներն առհասարակ չեն վճարել տրանսպորտի համար։
«8 մլն դրամ ինքնաթիռի տոմսի գումար տվող քաղաքապետին դժվար է հաստակալ 36 000 դրամ ստացողի հալը, ինչպես ժողովուրդն է ասում։ Նույն ավտոբուսի վարորդներն էլ շատ նորմալ են վերաբերվում այս բոյկոտին, որովհետև տուժող մյուս կողմ էլ իրենք են»,- պարզաբանել է նա։
Քաղաքացիները Օպերայի հարակից տարածքում «100 դրամ» գրությամբ թռուցիներով բոյկոտել են թանկացումը։ Նրանք շեշտել են, որ Երևանի քաղաքապետարանի բյուջեն ունի բավարար գումար, որպեսզի նոր ավտոբուսները սպասարկվեն։
«Միլիոնավոր դոլարներ են աշխատում։ Թող քիչ լափեն։ Այնքան գումար կա, որ կհերիքի տրանսպորտի և մնացած ծախսերին»,- ասել է ակցիայի մի մասնակից։
Քաղաքացիներից մեկը նշել է, որ չի վճարելու 150 դրամ։
«50 դրամը կես հաց է։ Կես հացով եկան իշխանության՝ վաղը մտնելու են ձեր տները։ Ես գերի չեմ, ես ՀՀ հպարտ քաղաքացի եմ, ոչ թե Նիկոլի հպարտ քաղաքացին։ Ես հավերժ քաղաքացի եմ, իրենց նման փախստական չեմ, որ ժամանակին գամ իշխանության, իմ թալանն անեմ ու փախչեմ»,- հստակեցրել է նա։
Երևանի ավագանին հունվարի 31-ին 33 կողմ ձայնով ընդունել էր որոշում, որով 1 ուղևորության համար սահմանվել է 150 դրամ, գործելու են նաև միասնական տոմսային համակարգի փաթեթները։
