Վարչապետ Նիկոլ Փաշինյանը հայտնել է, որ կնոջ՝ Աննա Հակոբյանի հետ իրենց անձնական բյուջեից ծախսել է 700 հազար դրամ (1759 դոլար)՝ կառավարական ամառանոցում ստուդիա սարքավորելու համար, որտեղ նկարահանում են ընտանեկան փոդքասթ։ Այս մասին նա հայտարարել է մամուլի ասուլիսի ժամանակ՝ պատասխանելով Armenia Today-ի այն հարցին, թե որքան արժե իրենց համատեղ փոդքասթի նկարահանումը։
«Արվել է մեր անձնական միջոցներով և պիտի հավաստիացնեմ, որ մեծ գումար չի ծախսվել՝ 700 հազար դրամ։ Որտեղի՞ց 700 հազար դրամ մեզ։ Էլի մեր անձնական միջոցներից՝ աշխատավարձ: Եվ իմիջիայլոց ասեմ՝ նախորդ՝ 2024 թվականին Աննայի սեփականությունը հանդիսացող մեր կինո «Հայրենիք»-ի բնակարանը վաճառել ենք մենք»,- նշել է նա։
Ասուլիսից հետո Փաշինյանն Armenia Today-ի թղթակցի հետ զրույցում պարզաբանել է, որ փոդքասթի համար սարքավորումները ձեռք են բերվել նաև ընտանեկան միջոցներով։ «Միկրոֆոնները մեր փողերով ենք գնել, ստուդիայի կահույքը պետական սեփականություն է, եղել է, նոր չենք գնել։ Գրքերի մի մասը պատկանում է վարչապետի ընտանիքին, մյուս մասը՝ պետությանը»,- պարզաբանել է նա։
Հարցին, թե արդյո՞ք վարչապետն իշխանական լծակներն օգտագործում է փոդքասթը ստեղծելու և տարածելու համար, Փաշինյանը խոստովանել է, որ նկարահանումներն իրականացնում է մի խումբ, որի պարտականությունների մեջ է մտնում իր գործունեության լուսաբանումը։ «Դա էլ են նկարում և նույն ձևով մոնտաժ են անում և այլն։ Այսինքն՝ այդ մասով, այո, օգտագործվում է։ «Ընտանեկան փոդքասթ» է անունը, բայց դա վարչապետի գործունեության մասն է, որովհետև տեսախցիկի առաջ վարչապետն է կանգնած։ Լինում է, որ վարչապետին են նկարում, կողքից ուրիշ մարդիկ էլ են լինում՝ ընտանիքի անդամներ և ընտանիքի ոչ անդամներ։ Դա չի նշանակում, որ մկրատով պետք է կտրեն մնացածը»,- ասել է վարչապետը։
Armenia Today-ի հարցին՝ պարզաբանելու, թե արդյոք իր կնոջ մասնակցությունը փոդքասթին կապված է 2026 թվականի խորհրդարանական ընտրություններում «Քաղաքացիական պայմանագրի» նախընտրական ցուցակը գլխավորելու Հակոբյանի մտադրության հետ, Փաշինյանը զարմանք է հայտնել և հավելել, որ առաջին անգամ է այդ մասին լսում։
«Աննա Հակոբյանը «Քաղաքացիական պայմանագիր» կուսակցության անդամ չէ։ Եթե կորոշի անդամագրվել, այդ դիմումը, ինչպես մյուս դիմումները, ՔՊ կուսակցության վարչությունը կքննարկի»,- եզրափակել է Փաշինյանը։
Փաշինյանը Հանրային հեռուստաընկերության եթերում հերքել էր իր ակտիվության և հնարավոր արտահերթ ընտրությունների միջև կապը։
2024 թվականի դեկտեմբերի 6-ին «Հրապարակ» թերթը գրել էր, որ խորհրդարանական ընտրություններում ՔՊ ցուցակը գլխավորելու է վարչապետի կինը։ Ըստ թերթի՝ այս հանգամանքով է պայմանավորված Հակոբյանի գերակտիվությունը․ նա կառավարությունում աշխատասենյակ, աշխատակազմ, փիառ թիմ ունի, տեղական, միջազգային հյուրեր է ընդունում և չունենալով պաշտոն՝ ինքն է որոշում պետության կադրային քաղաքականությունը։ 2024 թվականի դեկտեմբերի 30-ին Փաշինյանը հայտարարել էր կնոջ հետ «Ընտանեկան փոդքասթ» վարելու մասին։
