Բաքվի հայտարարությունները, զորավարժությունների անցկացումն ու Ադրբեջանին զենքի մատակարարումը մտահոգում են Երևանին, հայտարարել է Հայաստանի անվտանգության խորհրդի քարտուղար Արմեն Գրիգորյանը:
«Ադրբեջանի հայտարարությունները մտահոգիչ են։ Բացի դրանից, մենք տեսնում ենք, որ ինտենսիվ զորավարժություններ են անցկացվում, տեսնում ենք ինտենսիվ թռիչքներ այլ երկրներից, որոնք, ամենայն հավանականությամբ, ռազմական տեխնիկա են տեղափոխում Բաքու»,- ասել է նա՝ պատասխանելով Ադրբեջանի կողմից լայնամասշտաբ հարձակման հնարավորության մասին հարցին։
Միևնույն ժամանակ, ԱԽ քարտուղարը հայտարարել է, որ հայկական կողմը վերջին տարիներին աշխատել է տարբեր ուղղություններով՝ տարածաշրջանում կայունություն ստեղծելու համար:
Կայունության որոշակի գործոնների թվում նա նշել է Հայաստանում ԵՄ դիտորդական առաքելության ներկայությունը՝ հույս հայտնելով, որ դրա տեղակայման ժամկետները կերկարաձգվեն, Հայաստանի միանալը ՄՔԴ-ի Հռոմի ստատուտին, որը, նրա խոսքով, «կարևոր գործոն է կայունության տեսանկյունից», ինչպես նաև երկրում իրականացվող ռազմական բարեփոխումները:
Ավելի վաղ ՀՀ ԱԳ նախարար Արարատ Միրզոյանը հայտարարել էր չստորագրված խաղաղության պայմանագրի պայմաններում Ադրբեջանի հետ սահմանին էսկալացիայի վտանգի մասին: Միաժամանակ, ՀՀ պաշտպանության նախարար Սուրեն Պապիկյանը գտնում է, որ տարածաշրջանում ռազմական էսկալացիայի հիմքեր այժմ չկան, իսկ Հայաստանի արտաքին հետախուզության ծառայությունը ցածր էր գնահատել Ադրբեջանի լայնածավալ ռազմական հարձակման հավանականությունը:
