«Տավուշը հանուն հայրենիքի» շարժումը նախատեսում է շարունակել այցելությունները մարզեր, ինչպես նաև աշխատում է ծրագրի վրա՝ ներգրավելով տարբեր ոլորտների փորձագետների՝ աշնանն ակտիվանալու համար, գրել է «Հրապարակ»-ը։
«Եթե անկանխատեսելի զարգացումներ չլինեն, «Տավուշը հանուն հայրենիքի» շարժումն աշնանը կրկին կակտիվանա»,- գրել է թերթը։
Լրատվականի տեղեկություններով՝ շարժումը պատրաստվում է այցելել Արարատի մարզ՝ Սյունիք այցելելուց հետո, ուր շարժման ակտիվիստներն առաջնորդ Բագրատ արքեպիսկոպոս Գալստանյանի հետ միասին այցելել էին հունիսի 28-ից՝ եռօրյա ժամկետով։
«Այժմ քննարկում են Արարատի մարզ գնալու հարցը, քանի որ հաջորդ «զոհը» Տիգրանաշեն համայնքն է․ «սահմանազատման» գործընթացի անվան տակ այն կարող է անցնել Ադրբեջանին: Իսկ դա նշանակում է, որ վտանգվում է միջպետական ճանապարհը, և կարող է կտրվել ՀՀ «աղջկա պարանոցը»` Սյունիքն ու Վայոց ձորը»,- գրել է թերթը։
«Հրապարակ»-ի տեղեկություններով՝ շարժման ներսում վերադասավորումներ են ընթանում, մշակում են ժամանակավոր կառավարության ծրագիրը, երկրի զարգացման տեսլականը՝ ոլորտային մասնագետների մասնակցությամբ աշնանն ակտիվ գործողությունների վերադառնալու համար՝ ներառյալ փողոցում գործողությունները:
«Երբ շարժումը կրկին ակտիվանա, այդ ծրագրերը կներկայացվեն հանրությանը։ Շարժման ակտիվը նախատեսում է աշնանը փողոցը կրկին ակտիվացնել, եթե, իհարկե, մինչ այդ ֆորսմաժորային իրավիճակ չստեղծվի»,- տեղեկացել է թերթը։
Հուլիսի 2-ին Գալստատյանը քաղաքական ուժերի հետ քննարկել էր սխալ հաշվարկներն ու հետագա ծրագրերը։ Հանդիպմանը մասնակցել էին «ՀՀԿ»-ն, «Ժառանգությունը», «Ապրելու երկիրը», Պարույր Հայրիկյանը, Արտաշես Գեղամյանը, «ԱԺԲ»-ն, «ՀՅԴ»-ն, «Համերաշխություն» կուսակցությունը և այլ քաղաքական գործիչներ։ «Բարգավաճ Հայաստան» և «Լուսավոր Հայաստան» կուսակցություններից որևէ մեկը չի գտնվել հանդիպմանը, տեղեկացրել է թերթը։
Հանդիպման ընթացքում ասվել է, որ եթե Հայաստանի վարչապետ Նիկոլ Փաշինյանը որոշի Ադրբեջանի նախագահ Իլհամ Ալիևի խնդրանքով փոխել ՀՀ սահմանադրությունը, շարժումը նորից դուրս կգա փողոց, կշարունակվեն անհնազանդության ակցիաներն ու տեղի կունենան հանրահավաքներ։
