Մարզային դպրոցների և մարզադահլիճների կառուցման ընթացքում մի շարք թերություններ հայտնաբերելուց հետո վարչապետ Նիկոլ Փաշինյանը ՀՀ պետական վերահսկողական ծառայությանը հրահանգել է ուսումնասիրություններ է սկսել քաղաքաշինության կոմիտեում, գրում է «Ժողովուրդ» օրաթերթը՝ հղում անելով վարչապետի մամուլի խոսնակ Նազելի Բաղդասարյանին:
«Մարզային այցերից հետո վարչապետ Նիկոլ Փաշինյանի հանձնարարությամբ ՀՀ պետական վերահսկողական ծառայությունն ուսումնասիրություններ է մեկնարկել ՀՀ քաղաքաշինության կոմիտեում պետական բյուջեի միջոցներով մի շարք հանրակրթական ու մարզամշակութային հաստատությունների կառուցման աշխատանքների, ինչպես նաև դրանց նախագծման, հեղինակային և տեխնիկական հսկողության նպատակով հատկացված պետական միջոցների կառավարման օրինականության և արդյունավետության վերահսկողության նպատակով»,- պարբերականը մեջբերում է Բաղդասարյանի խոսքերը։
Հունվարի 3-ին վարչապետ Նիկոլ Փաշինյանն այցելել էր Լոռու մարզ և ծանոթացել կառավարության ֆինանսավորմամբ համայնքներում իրականացվող ծրագրերի ընթացքին: Շրջայցի ընթացքում մի շարք նորակառույց մարզադահլիճներում ու դպրոցներում վարչապետն արձանագրել էր բազմաթիվ բացթողումներ: Հաջորդ օրը կառավարության նիստում Քաղաքաշինության կոմիտեի նախագահ Արմեն Ղուլարյանը և Լոռու մարզպետ Արամ Խաչատրյանն ազատվել էին պաշտոններից: Հաջորդ օրը վարչապետն արդեն Արմավիրի մարզում էր մի շարք շինարարակական բացթողումներ ու թերություններ նկատել, որի հետ Արմավիրի մարզպետ Էդվարդ Հովհաննիսյանն ազատվել էր պաշտոնից:
