Ադրբեջանի կողմից Հայաստանին փոխանցված նոր առաջարկները խաղաղության պայմանագրի վերաբերյալ ցույց են տալիս, որ բանակցային գործընթացը կանգ չի առել և շարունակվում է։ Ինչպես տեղեկացնում է «Արմենպրես»-ը, Խորվաթիայի արտաքին գործերի նախարար Գորդան Գրլիչ Ռադմանի հետ համատեղ մամուլի ասուլիսի ժամանակ այս մասին ասել է ՀՀ արտաքին գործերի նախարար Արարատ Միրզոյանը։
«Ահա 10 օր առաջ ստացել ենք Ադրբեջանի առաջարկները։ Ըստ էության, քննարկման փուլում ենք։ Սա ցույց է տալիս, որ բանակցային գործընթացը մեծ հաշվով կանգ չի առել, մեկնաբանությունները և առաջարկները շարունակվել են փոխանակվել, և այժմ մենք հանդես կգանք մեր նոր մեկնաբանություններով՝ ադրբեջանական կողմի մեկնաբանությունների հիման վրա»,- ասաց Միրզոյանը։
Հայաստանի արտաքին գործերի նախարարը նպատակահարմար չի համարել առաջարկությունների բովանդակությունը հրապարակել, որովհետև խոսքը դետալների և բանակցային գործընթացնի մասին է։
«Կողմերի դիրքորոշումները զանազան հարցերի շուրջ տարբեր փուլերում որոշ դեպքերում մոտենում են միմյանց, որոշ դեպքերում շարունակում են մնալ իրարից բավականին հեռու։ Հետևաբար, քաղաքական առումով նպատակահարմար չի վերցնել առանձին որևէ դետալը և ասել, թե այս պահին ինչպիսին են կողմերի դիրքորոշումները այդ հարցի շուրջ, որովհետև վաղը կարող է բոլորովին այլ պատկեր լինել։ Կրկնում եմ՝ որոշ հարցերում մեզ մոտեցնել հնարավոր է եղել, բայց հայկական կողմն ունի իր սկզբունքային հարցերը այս գործընթացում, և այդ հարցերի մասին, կարծում եմ, հրապարակավ բազմիցս խոսել ենք»,- ավելացրել է նախարարը։
Ինչ վերաբերվում է Մոսկվայում Հայաստանի և Ադրբեջանի արտգործնախարարների հանդիպման չեղարկմանւ և հետագայում երկու երկրների բարձրաստիճան պաշտոնյաների միջև երկկողմ հնարավոր հանդիպումներին, Միրզոյանը նախ հիշեցրել է, որ հայկական կողմը չի չեղարկել Մոսկվայում հանդիպումը, այլ հետաձգել է։
«Ինչպես այս ձևակերպումը թույլ է տալիս եզրակացնել, մենք որոշակի հարմար պահի կգործարկենք այդ հետաձգված հանդիպումը։ Հանդիպումը կարող է տեղի ունենալ Մոսկվայում, հանդիպումները կարող են տեղի ունենալ այլուր։ Եթե հետևել եք հետագծին, մենք տարբեր մայրաքաղաքներում և տարբեր քաղաքներում ենք այսպիսի հանդիպումներ ունեցել։ Կուզեի ասել, որ արդարացի կլինի նկատել, որ քաղաքի վայրի ընտրությունը, իհարկե, կարևոր է, բայց նաև չափազանց էական ազդեցություն, մեծ հաշվով, գործընթացի վրա չունի։ Եվ այս առումով պատրաստ ենք հերթական հանդիպումը անցկացնել Մոսկվայում»,- եզրափակել է Միրզոյանը։
Ավելի վաղ Միրզոյանը Գերմանիայի ԱԳ նախարար Աննալենա Բուրբոկի հետ բանակցությունների արդյունքներին հաջորդած ասուլիսում ասել էր, որ Հայաստանն օրեր առաջ ստացել է Ադրբեջանի արձագանքն ու խաղաղության պայմանագրի վերաբերյալ առաջարկները։
