ԵՄ-ն ակտիվորեն աշխատում է Ադրբեջանի և Հայաստանի միջև վստահության մթնոլորտ ստեղծելու ուղղությամբ, սակայն ավելի շատ ջանքեր են անհրաժեշտ։ Այս մասին Ստամբուլում TRT համաշխարհային ֆորումի շրջանակներում հայտարարել է Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարը, հայտնում է ֆորումի Twitter-ը։
«Կա խաղաղության իրական ցանկություն և խաղաղության հնարավորություններ: Սակայն 30 տարվա հակամարտությունից հետո վստահություն ստեղծելու համար մեծ ջանքեր են պահանջվում»,- ասել է նա:
Ըստ Կլաարի՝ «առաջնորդություն է պետք» և՛ Երևանից, և՛ Բաքվից, և խոսքը ոչ միայն Հայաստանի և Ադրբեջանի ղեկավարների ջանքերի, այլև երկու երկրների հասարակությունների միջև վստահության ամրապնդմանն ուղղված միջոցներ ձեռնարկելու մասին է։
Դեկտեմբերի 8-ին Երևանում ԵՄ հատուկ ներկայացուցիչը հանդիպումներ է ունեցել ՀՀ վարչապետ Նիկոլ Փաշինյանի և ԱԳ նախարար Արարատ Միրզոյանի հետ։ Հանդիպումների ընթացքում քննարկվել են Հայաստանի և Ադրբեջանի միջև հարաբերությունների կարգավորման, Լեռնային Ղարաբաղի շուրջ վերջին գործընթացների, Ղարաբաղի հայերի իրավունքների և անվտանգության երաշխիքների ապահովման, տարածաշրջանային տրանսպորտային ենթակառուցվածքների սահմանազատման և ապաշրջափակման հարցեր։
