Ադրբեջանի կողմից Ղարաբաղում ռուս խաղաղապահների վրա հարձակումը կհանգեցնի Ռուսաստանի դեմ պատերազմի։
Այս մասին Armenia Today-ի հետ զրույցում ասել է ռուսաստանցի քաղաքագետ Ալեքսանդր Խրամչիխինը` պատասխանելով Ադրբեջանի կողմից Արցախում լայնածավալ ռազմական գործողությունների վերսկսման դեպքում ՌԴ-ի հնարավոր արձագանքի մասին հարցին։
«Եթե հարձակում լինի անմիջապես խաղաղապահների վրա, ապա ստացվում է պատերազմ Ռուսաստանի դեմ։ «Եթե ինչ-որ մեծամասշտաբ բան լինի, ապա, իհարկե, Ռուսաստանի մոտ խնդիրներ են առաջանում, քանի որ նա հիմա նույնպես բոլորովին դժկամությամբ է այդ ճակատն ունենալ Ադրբեջանի հետ», – ասել է նա:
Փորձագետի խոսքով` ռուս խաղաղապահների հետ բախումը «Ադրբեջանի համար այնքան էլ շահեկան չէ»։ Խրամչիխինն ընդգծել է, որ այդ դեպքում Ադրբեջանն իրեն Ռուսաստանի թշնամին կդարձնի Մոսկվայի հետ դաշնակցության մասին համաձայնագրի ստորագրումից ընդհամենը մեկ ամիս անց:
«Այնուամենայնիվ, դա մի քիչ տարօրինակ կլիներ նրա կողմից։ Ալիևն ինձ վրա ինքնասպանի տպավորություն չի թողել», – ասել է քաղաքագետը։
Մարտի 24-ին, ժամը 16:00-ի դրությամբ, Ադրբեջանի զինված ուժերն Ասկերանի շրջանի Փառուխ գյուղի ուղղությամբ խախտել են շփման գիծը: Պաշտպանության բանակի և Արցախի Հանրապետությունում տեղակայված ռուսական խաղաղապահ զորակազմի ներկայացուցիչները փորձում են նրանց վերադարձնել ելման դիրքեր:
Ադրբեջանական ուժերը մարտի 25-ի գիշերը կրակ են բացել ՊԲ ստորաբաժանումների վրա՝ կիրառելով ինչպես տարբեր տրամաչափի հրաձգային զինատեսակներ, այնպես էլ հարվածային ԱԹՍ: Այս պահին ճշտված տեղեկություններով ՊԲ 3 զինծառայողներ զոհվել են, 14 անձինք ստացել են տարբեր աստիճանի վիրավորումներ։
Այսօր՝ ժամը 11։00-ի հատվածում ադրբեջանական ուժերը կրկին փորձ են արել առաջխաղացում ապահովել, ինչը կանխվել է Արցախի ՊԲ ուժերի կողմից։
