Ուժային կառույցները խուզարկություններ են իրականացնում «Հայաստանի էլեկտրական ցանցեր» ընկերության գլխավոր գրասենյակում։ Տեղեկությունն Armenia Today-ին հաստատել են ընկերության աղբյուրները։
Ըստ ՀԷՑ մամուլի քարտուղար Նատալյա Սարջանյանի՝ շենքն արգելափակված է, աշխատակիցներին թույլ չեն տալիս մուտք գործել։
Քննչական կոմիտեն Armenia Today-ին մեկնաբանել է ՀԷՑ-ում և ընկերության տնօրենների խորհրդի նախագահ Նարեկ Կարապետյանի բնակարանում իրականացվող խուզարկությունները:
«Քննչական կոմիտեի տնտեսական հանցագործությունների և մաքսանենգությունների քննության գլխավոր վարչությունում և Երևան քաղաքի քննչական վարչությունում նախաձեռնված քրեական վարույթների շրջանակներում կատարվում են անհետաձգելի քննչական գործողություններ: Առաջիկայում հանդես կգանք պաշտոնական հաղորդագրությամբ»,- նշել է ՔԿ խոսնակ Կիմա Ավդալյանը։
Այլ մանրամասներ Ավդալյանը չի հայտնել։ Հայտնի չէ, թե որն է խուզարկությունների պատճառը:
Հուլիսի 2-ի առավոտյան վարչապետ Նիկոլ Փաշինյանը սպառնացել էր աշխատանքից ազատել ՀԷՑ աշխատակիցներին՝ «քաղաքական ինտրիգներով» զբաղվելու և իրենց պարտականությունները չկատարելու համար։ Նույն օրը խուզարկություններ էին սկսվել Երևանում գտնվող «Տաշիր գրուպ»-ի գլխավոր գրասենյակում։
Հայաստանի խորհրդարանը հուլիսի 3-ին ընդունել էր մի շարք օրենսդրական փոփոխություններ, որոնք ուղղված են «Հայաստանի էլեկտրական ցանցեր» ՓԲԸ-ն պետության վերահսկողության տակ վերցնելուն։
Հուլիսի 4-ին Քննչական կոմիտեն Armenia Today-ին տեղեկացրել էր, որ ընկերության գրասենյակում կատարված խուզարկություններից հետո հարուցված գործի շրջանակում կալանավորվածների թիվը հասել է չորսի։
