Փաստաբանները միջնորդություն են ներկայացրել դատախազություն՝ Շիրակի թեմի առաջնորդ Միքայել արքեպիսկոպոս Աջապահյանի նկատմամբ քրեական հետապնդումը դադարեցնելու վերաբերյալ, հայտնել է նրա փաստաբանների խումբը։
Միջնորդության մեջ նշվում է, որ Միքայել սրբազանին մեղսագրված արարքը չի պարունակում հանցակազմի հատկանիշներ, ուստի քրեական հետապնդումը ենթակա է դադարեցման: Փաստաբանները շեշտել են, որ քննարկվող հանցակազմի իմաստով բռնության կոչեր չեն կարող համարվել իշխանության քննադատությունը, իշխանությունների հրաժարականի անհրաժեշտության հիմնավորումը, հրաժարականի պահանջը, ցույցեր, երթեր, հանրահավաքներ անցկացնելու կոչը կամ կազմակերպումը, փոխաբերական իմաստով արված արտահայտությունները:
«ՀՀ քրեական դատավարության օրենսգրքով սահմանված կարգով արդեն իսկ արձանագրվել է, որ հաղորդման մեջ նկարագրված հանգամանքներով չի փաստվում այնպիսի դեպք, գործողություն կամ անգործություն, որին ողջամտորեն կարող է տրվել ՀՀ քրեական օրենսգրքով նախատեսված որևէ արարքին համապատասխանելու նախնական իրավական գնահատական»,- ասվում է հայտարարության մեջ։
Փաստաբանները նշել են՝ հաշվի առնելով, որ Աջապահյանին մեղսագրվող արարքն «ամբողջությամբ բացահայտված» է՝ տեսաձայնագրված, և ընդամենն անհրաժեշտ է բովանդակությանը գնահատական տալ, ուստի բացակայում է նաև «քննություն կատարելու» անհրաժեշտությունը, որով պայմանավորված կարող է արդարացվել վարույթը: Ըստ պաշտպանական կողմի՝ քրեական հետապնդումն անհապաղ դադարեցնելու համար առկա են բոլոր հիմքերը:
Հունիսի 27-ին ԱԱԾ աշխատակիցները քննչական գործողություններ էին իրականացրել Շիրակի թեմի առաջնորդարանում և Գարեգին Բ-ի նստավայրում։ Ուժայինները երկու ժամ ժամանակ էին տվել Աջապահյանին, որպեսզի ինքնակամ ներկայանա իրենց մոտ, հակառակ դեպքում՝ նրանք սպառնացել էին վերադառնալ և ուժային գրոհ սկսել Վեհարանի վրա։ Աջապահյանը համաձայնել էր ներկայանալ և ապացուցել իր նկատմամբ հարուցված գործի անօրինականությունը։ Հունիսի 28-ին Աջապահյանը 2 ամսով կալանավորվել էր՝ իշխանության զավթման գործով։
