Ակտիվիստ Արթուր Չախոյանը Նոր Նորքի թաղապետարանում իր, թաղապետ Տիգրան Տեր-Մարգարյանի և վարչական շրջանի աշխատակիցների միջև տեղի ունեցած միջադեպը միտումնավոր կազմակերպած է որակել։ Չախոյանը, որին թաղապետարանում ծեծի էին ենթարկել, մայիսի 8-ին տեղի ունեցած ասուլիսին ձայնագրություններ է հրապարակել՝ հայտարարելով, որ թաղապետն էլ է խոստովանել իրեն միտումնավոր վիրավորելու հանգամանքը։
«Թաղապետն իր հարցազրույցում ասել է, որ միտումնավոր է զանգահարել ինձ, հայհոյանքներ ու վիրավորանքներ հնչեցրել։ Սա այն դեպքում, երբ ես որևիցե վիրավորական արտահայտություն չեմ արել։ Հիմա ասեք՝ որտե՞ղ է իմ սադրանքը, որ իրենց իշխանության թալա՞նն ենք բացահայտում»,- ասել է Չախոյանը։
Չախոյանի պնդմամբ՝ թաղապետն իրեն «կոռուպցիոն բացահայտումների ֆոնին» ավելի վաղ աշխատանքի առաջարկ է արել, ինչը մերժել է, քանի որ, իր խոսքով, «չի վաճառվում»։
«Ունեմ սկզբունքներ, արժեհամակարգ, ինձ համար կան կարմիր գծեր, որոնք ես չեմ անցնում։ Եթե պաշտոն ունենամ, պարզ է, որ այս ամենի մասին պետք է լռեմ»,- հավելել է նա։
Ակտիվիստը նշել է, որ վարույթի շրջանակում դեռ ցուցմունք չի տվել։ Չախոյանը, ում խուլիգանության հատկանիշներով մեղադրանք է առաջադրվել, նաև տեղեկացրել է, որ իրավական աջակցության ծախսերը հոգալու համար դրամահավաք է սկսում։
«Իմ նախաձեռնած կոռուպցիոն բացահայտումների արդյունքում ինձ վրա մահափորձ է կատարվել, մի շարք շինծու քրեական գործեր են հարուցվել՝ նպատակ ունենալով ինձ լռեցնել։ Սակայն իմ անմեղությունն իրավական դաշտում պաշտպանելու համար պահանջվել են մեծ ֆինանսական ծախսեր փաստաբանական ծառայությունների համար, որոնք մինչ այժմ հոգացել եմ իմ սեփական միջոցներով։ Վերջին իրադարձությունների հետևանքով ֆինանսական ծախսերն զգալիորեն աճել են, ինչի պատճառով ֆինանսապես չեմ կարողանում իրավական դաշտում իմ պաշտպանությունը լիարժեք և ամբողջ ծավալով կազմակերպել։ Այդ իսկ պատճառով նշված խնդիրը լուծելու համար առաջին անգամ նախաձեռնում եմ դրամահավաք»,- ավելի ուշ գրել է նա։
Ապրիլի 29-ին Չախոյանը հայտարարել էր, որ Նոր Նորք վարչական շրջանի ղեկավարն սպառնացել, հայհոյել է իրեն և Երևանի ավագանու «Մայր Հայաստան» խմբակցության անդամ Մեսրոպ Մանուկյանին։ Վերջիններս թաղապետի նկարի վրա յոգուրտ էին լցրել։ Չախոյանն ապրիլի 29-ին գրել էր, որ գնալու է թաղապետարան՝ հանրային քննարկմանը մասնակցելու նպատակով:
Ապրիլի 30-ին, երբ Չախոյանն այցելել էր թաղապետարան, ծեծկռտուք էր տեղի ունեցել վարչական շրջանի ղեկավարի, նրա աջակիցների և Չախոյանի միջև, որից հետո վերջինիս ոստիկանությունից վնասվածքներով տեղափոխել էին հիվանդանոց, այնուհետ մեղադրանք առաջադրել։ ՔԿ-ն մայիսի 1-ին տեղեկացրել էր, որ ապրիլի 29-ի դեպքի առթիվ նախաձեռնված քրվարույթի շրջանակներում քրհետապնդում էր հարուցվել 2 անձի նկատմամբ։ Ապրիլի 30-ի դեպքի առնչությամբ հանրային քրեական հետապնդում էր հարուցվել 4 անձի նկատմամբ։ ԶԼՄ-ները գրել էին, որ մեղադրանք է առաջադրվել նաև Տեր-Մարգարյանին։
