Ապրիլի 3-ին «Նուբարաշեն» քրեակատարողական հիմնարկում դատապարտյալների ծեծի մասին ահազանգից հետո ՔԿՀ մեկնած Մարդու իրավունքների պաշտպանի արագ արձագանքման խումբն ազատությունից զրկված անձանց մոտ մարմնական վնասվածքներ է արձանագրել, հայտնել են ՄԻՊ աշխատակազմից։
Ըստ ՄԻՊ հաղորդագրության՝ ազատությունից զրկվածներից ոմանք պատմել են անհամաչափ ֆիզիկական ուժի, ինչպես նաև իրենց նկատմամբ վիրավորանքներ և հայհոյանքներ հնչեցնելու մասին։ Նրանք ՄԻՊ-ի խմբին ահազանգել էին նաև խցերում առկա գույքը կոտրելու մասին։
«Այցի ընթացքում Պաշտպանի աշխատակազմի ներկայացուցիչներն առանձնազրույց են ունեցել ազատությունից զրկված շուրջ 30 անձանց, այդ թվում՝ ցմահ դատապարտյալների և կալանավորվածների հետ, շրջայց կատարել խցերում, ուսումնասիրել ազատությունից զրկված անձանց վերաբերյալ կազմված փաստաթղթերը: Արձանագրել է, որ ազատությունից զրկված 2 անձի մոտ առկա վնասվածքների կասկածի կապակցությամբ կատարվել է նաև ռենտգեն հետազոտություն»,- հավելել են գրասենյակից։
ՄԻՊ-ից հավելել են, որ այցի ընթացքում ստացված տեղեկություններն ու արձանագրված խնդիրներն ամփոփում են և պարզաբանումներ կպահանջեն պետական իրավասու մարմիններից:
Իրավապաշտպան Ժաննա Ալեքսանյանն ապրիլի 4-ին տեղեկացրել էր, որ ահազանգ է ստացել «Նուբարաշեն» քրեակատարողական հիմնարկից, ըստ որի՝ 5-րդ հարկում ցմահ դատապարտյալների ջարդ է կազմակերպվել։ «Նուբարաշեն» ՔԿՀ էր մեկնել ՄԻՊ արագ արձագանքման խումբ։
