Մարտի 30-ին՝ Գյումրիի ավագանու արտահերթ ընտրություններին, «հօգուտ ընդդիմադիր թեկնածուներից մեկի ընտրախախտում կատարելու» կասկածով ձերբակալված տարեց կանայք ազատ են արձակվել, հայտնել են փաստաբաններ Ռուբել Մելիքյանը և Արսեն Բաբայանը։
Դատարանը նրանց նկատմամաբ վարչական հսկողություն է սահմանել։
««Տատիկների գործով» դատարանը մերժեց քննիչի՝ Անահիտ Խալաթյանի («Մեր քաղաքը» նախընտրական դաշինքով ավագանու թեկնածու-խմբ․) նկատմամբ տնային կալանք կիրառելու միջնորդությունը: Նա ազատության մեջ է»,- հայտնել է Բաբայանը։
Մելիքյանն էլ նշել է, որ իր պաշտպանյալին՝ «Կիմա տատիկին 72 ժամ՝ մինչև սահմանված վերջին րոպեն ձերբակալված են պահել», որից հետո նա ազատ է արձակվել։
Մարտի 30-ին Հակակոռուպցիոն կոմիտեն Armenia Today-ին հայտնել էր ավագանու թեկնածուի և այլ անձանց ձերբակալության մասին։ Բաբայանը գրել էր, որ ձերբակալվածների թվում է «Մեր քաղաքը» դաշինքի ավագանու անդամության թեկնածու Խալաթյանը։ Մելիքյանը հայտնել էր, որ հինգ իրավապաշտպանների նախաձեռնությունը որոշել է ստանձնել ձերբակալված 80-ն անց տարեց կանանց պաշտպանությունը։ Կանանց տեղափոխել էին Երևան։
