Լոռու մարզի Վանաձոր քաղաքում ոստիկանների կողմից խոշտանգված արցախցի Տիգրան Ուլուբաբյանը վաղը Քննչական կոմիտեում առերես հարցաքննության կենթարկվի, հայտնել է նրա փաստաբան Ռոման Երիցյանը։
Այսօր ակցիա է տեղի ունեցել ՔԿ-ի մոտ՝ պահանջելով պատժել Ուլուբաբյանին խոշտանգած ոստիկաններին։
Քաղաքացիները փակել էին ՔԿ տանող ճանապարհը, որից հետո Ուլուբաբյանին ու Երիցյանին հրավիրել էին ներս։
Ուլուբաբյանը նշել է, որ առանց որևէ փաստի, մեղադրանքի իրեն ծեծել ու հայհոյել են։ «Բռնել են տարել առաջին օրը հավայի հարցաքննել, ոչ մի տեղ չեմ դիմել։ Երկրորդ օրը տարել են ծեծել, հայհոյել։ Ծեծելը հեչ, հայհոյած չլինեին, էսքան բանը չէր լինի։ Նրանք օրենքի մարդիկ են, անմեղ մարդուն բռնում-ծեծում են»,- պատմել է նա։
Փաստաբանը հավելել է, որ արցախցի երիտասարդին խոշտանգած ոստիկաններն իդենտիֆիկացված և ձերբակալված չեն։ «Տիգրան Ուլուբաբյանին խոշտանգած ոստիկանների ձերբակալությունը ՔԿ-ն պայմանավորում է նրա լրացուցիչ հարցաքննությամբ, որը նշանակված է վաղը՝ 17։30-ին»,- մանրամասնել է Երիցյանը։
Մարտի 17-ին Երիցյանը հայտնել էր, որ Վանաձոր քաղաքում ոստիկանները ֆիզիկական բռնություն են գործադրել արցախցի, 28-ամյա Ուլուբաբյանի նկատմամբ՝ հորդորելով ավազակության դեպքը վերցնել իր վրա։
Մանրամասները՝ տեսանյութում։
