Քրեական ոստիկանության ծառայողներն առգրավել են շուրջ 18 կգ թմրամիջոց, հայտնում է ՀՀ ՆԳՆ մամուլի ծառայությունը։
Ըստ գերատեսչության` տվյալներ են ստացվել, որ Իրանից մաքսանենգ ճանապարհով Հայաստան է ներմուծվելու մեծ քանակի թմրամիջոց, որի մի մասն իրացվելու էր տեղում, իսկ մյուս մասը պետք է տեղափոխվեր Վրաստան:
Թմրամիջոցների ապօրինի շրջանառության գործով կալանավորվել է 11 անձ։ Նրանց թվում են Երևանի 40-ամյա, 51-ամյա և 36-ամյա, Արարատի մարզի 40-ամյա, Կոտայքի մարզի 46-ամյա բնակիչները և Վրաստանի քաղաքացի, ազգությամբ հայ 46-ամյա քաղաքացին:
«Վրաստանի քաղաքացի, ազգությամբ հայ անձը Վրաստանից ժամանել էր Հայաստան, և եղբոր ազգականի հետ վերցրել էին թմրամիջոցը։ Այնուհետև թմրամիջոցը տեղափոխել էին Լալվար սարի գագաթ, որը գտնվում է Հայաստանի և Վրաստանի սահմանամերձ հատվածում: Նպատակն այն էր, որ Վրաստանի քաղաքացին օրինական ճանապարհով սահմանը հատեր, մեկներ Վրաստան, ապա Վրաստանից արդեն ապօրինի սահմանահատման միջոցով սարի գագաթից վերցներ թմրամիջոցը և տեղափոխեր Վրաստան»,- ասվում է հաղորդագրության մեջ։
Երևանում իրավապահները ձերբակալել են Երևանի 38-ամյա և Սյունիքի մարզի 39-ամյա բնակիչներին: Նրանց մոտ հայտնաբերված փաթեթում կային ընդհանուր 202 գրամ մեթամֆետամինի և 1 կգ, 155 գրամ մարիխուանայի նմանվող զանգվածներ։ Հայտնաբերվել է նաև ինքնաձիգ` 28 փամփուշտով:
Ըստ ՆԳՆ-ի՝ իրավապահները Եղվարդում ձերբակալել են Շիրակի մարզի 33-ամյա և 32-ամյա բնակիչների՝ համացանցի միջոցով թմրամիջոցների իրացման մեղադրանքով:
Հունվարի 20-ին Եղվարդի խճուղում ձերբակալվել էր Երևանի 32-ամյա բնակիչ: Նրա վարած ավտոմեքենայի սրահում հայտնաբերվել է 6 փաթեթ՝ ընդհանուր շուրջ 6 կգ մարիխուանայի նմանվող զանգվածով։
ՆԳՆ-ից հավելել են, որ ձեռնարկվում են միջոցառումներ՝ Իրանից թմրամիջոցներն ուղարկողների և Հայաստանում նրանց օժանդակած անձանց ինքնությունը պարզելու ուղղությամբ:
