ՀՀ ՆԳՆ-ից Armenia Today-ին հաստատել են «Քաղաքացիական պայմանագիր» կուսակցության նախկին անդամ Թաթուլ Ասիլյանին Ռուսաստանի Դաշնության իրավապահների կողմից կալանավորելու լուրը։
ՆԳՆ ոստիկանության հասարակայնության հետ կապի և լրատվության վարչությունից տեղեկացրել են, որ Ասիլյանին կալանավորել են սեպտեմբերի 21-ին։
«Ռուսական կողմից տեղեկացրել են հետախուզվողին հայտնաբերելու մասին»,- հավելել են ՆԳՆ-ից։
Կալանավորման մասին սեպտեմբերի 23-ին հայտնել էր Tert.am-ը։
Մայիսին Ասիլյանի նկատմամբ ՆԳՆ-ն հետախուզում էր հայտարարել ՀՀ Քրեական օրենսգրքի 344-րդ հոդված 2-րդ մասի հատկանիշներով (տրանսպորտային միջոցներ վարելու իրավունքից զրկված, կամ այդ իրավունքը կասեցված, կամ այդ իրավունքը չունեցող անձի կողմից տրանսպորտային միջոցներ վարելը, առավելագույն պատիժն ազատազրկում՝ 2 տարի ժամկետով)։
2023-ի նոյեմբերի 13-ին «Քաղաքացիական պայմանագրի» վարչության որոշմամբ Ասիլյանին հեռացրել էին կուսակցությունից։ 2024-ի հունվարին կրակել էին Ասիլյանի տան ուղղությամբ։ 2024-ի հունվարին «Հրապարակը» գրել էր, որ Ասիլյանի՝ ՔՊ-ից հեռանալու պատճառը «նրա մասնակցությունն է կոռուպցիոն գործարքներում»։ Թերթը գրել էր, որ նա «քաղաքացիներից գումար էր վերցրել շինթույլտվությունների համար՝ «վերևներին» միջնորդելու նպատակով»։
