Ճամբարակ քաղաքի Տիգրան Մեծ փողոցի 4-րդ շենքում տեղի ունեցած պայթյունի առթիվ, որի հետևանքով մահացել է 4 անձ, ՀՀ Քննչական կոմիտեն նախաձեռնել է քրեական վարույթ, հայտնել է ՔԿ մամուլի խոսնակ Կիմա Ավդալյանը։
Ըստ նրա՝ գործերն առնչվում են ՔՕ 412-րդ հոդվածի 2-րդ մասի 2-րդ կետին (անվտանգության պահանջներին չհամապատասխանող հումքերի կամ ապրանքների շրջանառությունը, աշխատանքների կատարումը կամ ծառայությունների մատուցումը, որն անզգուշությամբ առաջացրել է մարդու մահ, առողջությանը ծանր վնասի պատճառում կամ այլ ծանր հետևանք, պատժվում է ազատազրկմամբ՝ մինչև 6 տարով):
Ավդալյանը նշել է, որ պայթյունի հետևանքով 7 չափահաս և 4 անչափահաս անձինք տարբեր մարմնական վնասվածքներով տեղափոխվել են Ճամբարակի առողջության կենտրոն:
Ճամբարակի Գարեգին Նժդեհի փողոցի բնակարաններից մեկում հրդեհ էր բռնկվել, ահազանգը ՀՀ ՆԳՆ փրկարար ծառայությունն ստացել էր հունիսի 11-ին՝ ժամը 8:34-ին: Ըստ նախնական տվյալների՝ շենքի բնակարաններից մեկում տեղի էր ունեցել պայթյուն։
Ավելի ուշ ՀՀ առողջապահության նախարարությունը տեղեկացրել է, որ Ճամբարակում առավոտյան տեղի ունեցած պայթյունի հետևանքով հոսպիտալացվել է 11 տուժած, կազմակերպվել է նրանցից 3-ի տեղափոխումը երևանյան բուժհաստատություններ:
Տուժածների առողջական վիճակը, ըստ առողջապահական գերատեսչության, գնահատվում է միջին ծանրության և բավարար, բոլորն ստանում են համապատասխան բուժօգնություն:
