Հայաստանում մայիսի 11-ին քամու հետևանքով 57 արտակարգ դեպք է գրանցվել, հայտնել են ՆԳՆ փրկարար ծառայությունից։
Մասնավորապես Երևանում 44, Արմավիրում՝ 1, Արագածոտնի մարզում՝ 2, Լոռիում՝ 4, Տավուշում՝ 2, Կոտայքում՝ 3, Արարատում՝ 1 դեպք է գրանցվել։
ՆԳՆ-ից հավելել են, որ քամու հետևանքով Երևանում, Աբովյանում, Վանաձորում, Դիլիջանում, Իջևանում, Արագածոտնի մարզի Ջամշլու, Կոտայքի մարզի Աղավնաձոր, Փյունիկ, Արմավիրի մարզի Մրգաստան գյուղերում վնասվել են տանիքի թիթեղներ, անձրևատար խողովակներ, տապալվել են ծառեր։
Նշվում է, որ փրկարարներն իրականացրել են տարածքների սահմանազատման, տանիքների, կառուցատարրերի ապամոնտաժման, անձրևատար, ծխատար խողովակների ամրացման, տապալված ծառերի մասնատման և հեռացման աշխատանքներ:
Մայիսի 11-ին ՆԳՆ-ից տեղեկացրել էին, որ Երևանում և մարզերում քամին ծառեր է տապալել, վնասել տանիքի թիթեղներ։
