Երևանում 3-ամյա Արևիկ Հ.-ն թունավորվել է տաքսու վարորդի տված հաբից՝ փաթաթված կոնֆետի թղթում, գրում է Shamshyan.com-ը։
Շենգավիթի համայնքային ոստիկանները պարզել են, որ ապրիլի 5-ին՝ կեսգիշերին մոտ, «Յանդեքս» ընկերության կողմից օգտագործվող Opel մակնիշի ավտոմեքենայում վարորդը երեխային հյուրասիրել է անհայտ ծագմամբ, քիմիական բաղադրությամբ հաբ՝ որպես կոնֆետ։
«Այն ուտելուց հետո երեխան սկսել է թուլանալ, առաջացել է սրտխառնոց և հայրը կասկածել է, որ երեխան թունավորվել է։ Նրան շտապ տեղափոխել է «Մուրացան» մանկական հիվանդանոց, որտեղ բժիշկներին հաջողվել է փրկել երեխայի կյանքը։ «Մուրացան» մանկական հիվանդանոցից ՆԳՆ-ին ահազանգել են, որ երեխան, ըստ նախնական տեղեկությունների, մաքրող միջոցի համար նախատեսված հաբերն ուտելու հետևանքով, «թունավորում քիմիական նյութով» ախտորոշմամբ է հիվանդանոց տեղափոխվել»,- ասված է հրապարակման մեջ։
Ոստիկանները հայտնաբերել են տաքսու վարորդին, որը Գեղարքունիքի մարզի բնակիչ 48-ամյա Արմեն Դ-ն։
«Նրան հրավիրել են ոստիկանության Շենգավիթի բաժին, որտեղ խոստովանել է, որ կոնֆետը ինքն է հյուրասիրել, իսկ այդ կոնֆետները իրեն հյուրասիրել էին օտարերկրացի 2 քաղաքացի, որոնց ինքը չի ճանաչել, պարզապես որպես ուղևոր ճանապարհից վերցրել է: Նրա ավտոմեքենայում ոստիկանները հայտնաբերել են նաև օտարերկրացիների տված կասկածելի կոնֆետները: Դեպքի փաստով ոստիկանության Շենգավիթի բաժնում փաստաթղթեր են ձևակերպվել, որոնք փախնցվել են ՀՀ քննչական կոմիտե»,- հավելել է կայքը՝ նշելով, որ օտարերկրացիների ինքնությունը պարզելու, նրանց հայտնաբերելու և քննչական բաժին ներկայացնելու ուղղությամբ օպերատիվ հետախուզական աշխատանքներ են իրականացվում։
