Մի քանի ԲԿ-ում, այդ թվում՝ «Սուրբ Գրիգոր Լուսավորիչ»-ում, տնօրենների փոփոխություն կլինի․ Ավանեսյան

Առաջիկայում մի քանի բժշկական կենտրոնում սպասվում են տնօրենների փոփոխություններ, կառավարության նիստից հետո տեղի ունեցած ճեպազրույցում հայտարարել է Առողջապահության նախարար Անահիտ Ավանեսյանը։

Նա նշել է, որ «Սուրբ Գրիգոր Լուսավորիչ» ԲԿ-ում և Ֆանարջյանի անվան ուռուցքաբանական կենտրոնում եկել է որակային նոր փուլի անցնելու ժամանակը։

«Երկու ԲԿ-ների ղեկավարությունն ու թիմերը խոշոր ներդրում են ունեցել լրիվ նոր մշակույթով, ստանդարտով, ենթակառուցվածքներով, ծառայություններով բժշկական կենտրոններ ձևավորելուն ուղղված։ Կարծում եմ՝ զարգացման նոր ուղիների ժամանակն է»,- ասել է նախարարը։

Ըստ նրա՝ «Սուրբ Գրիգոր Լուսավորիչ» ԲԿ-ի տնօրենի պաշտոնում քննարկվում է ԱԺ առողջապահության հարցերի մշտական հանձնաժողովի նախկին նախագահ Նարեկ Զեյնալյանի անունը, սակայն այլ թեկնածուներ ևս կան, որոնց անունները չնշեց։

Զեյնալյանը վարչապետ Նիկոլ Փաշինյանի խնդրանքով նոյեմբերի 19-ին հրաժարական էր տվել՝ պատգամավոր Հովիկ Աղազարյանի և ՀՀ քննչական կոմիտեի նախկին ղեկավար Արգիշտի Քյարամյանի մասնակցությամբ վեճից հետո։

2024 թվականի ապրիլին մամուլը գրել էր, որ Առողջապահության նախկին նախարար Արսեն Թորոսյանը մտադիր է իր ընկերոջը՝ Ֆանարջյանի անվան ուռուցքաբանական ազգային կենտրոնի ղեկավար Նարեկ Մանուկյանին նախարարի պաշտոնի համար բարեխոսել։