Սյունիքի մարզի 2 անչափահաս բնակչի (17-ամյա Կարեն Արմենի Ջհանգիրյանի և Անդրեյ Արմենի Գյագունցի) ՝ սահմանը հատելու լուրն ընդամենը վարկած էր, լրագրողների հետ զրույցում հայտարարել է Սյունիքի մարզպետ Ռոբերտ Ղուկասյանը։
Այսպես է նա մեկնաբանել ԱԱԾ-ի հաղորդագրությունը, որը հունիսի 6-ին նախ հայտարարել էր անչափահաս բնակիչների մոլորվելու և Ադրբեջանի տարածքում հայտնվելու մասին, ապա նույն օրը երեկոյան տեղեկացրել, որ տղաները հայտնաբերվել են և այժմ գտնվում են Հայաստանում՝ հերքելով տեղեկությունը, որ նրանց առևանգել են ադրբեջանցիները:
«Տղաները մոլորվել էին, այդ հատվածներում կապ չկար։ Նրանք Ադրբեջանի սահմանը չէին հատել, կարծում եմ՝ սպասել են մութն ընկնի, որ վերադառնան»,- պարզաբանել է Ղուկասյանը։
Անդրադառնալով սահմանային կրակոցներին՝ նա նշել է, որ մարզում գիշերային ժամերին մերթընդմերթ կարճատև կրակոցների ձայներ են լսվում, սակայն բնակավայրերի ուղղությամբ չեն։
«Այդ կրակոցները լսելի են, նպատակները կարող են խիստ տարբեր լինել։ Կրակոցների ֆոնին ավելի շատ է մարդ հավատում և հույս ունենում, որ խաղաղություն կլինի։ Ցերեկային ժամերին կրակոցներ չկան, ուստի գյուատնտեսական աշխատանքներին չեն վնասում»,- մանրամասնել է մարզպետը։
Դեպքի առթիվ ՔԿ-ն քրեական վարույթ էր նախաձեռնել՝ առևանգման հատկանիշներով։
