«Թուրքական փողեր» և «հայերի արյուն՝ ձեռքերին». ANCA-ն քննադատել է ԱՄՆ-ում ՀՀ դեսպանատան համագործակցությունը Թուրքիայի օգտին աշխատած լոբբիստների հետ

Ամերիկայի Հայ Դատի Հանձնախմբի (ANCA) գործադիր տնօրեն Արամ Համբարյանն Armenia Today-ի հետ զրույցում մեկնաբանել է ԱՄՆ-ում Հայաստանի դեսպանատան և ամերիկյան Mercury Public Affairs լոբբիստական ​​և PR ընկերության համագործակցությունը։ ԱՄՆ արդարադատության նախարարությանը տրամադրած հաշվետվությունների համաձայն՝ ընկերությունը ներկայացրել է Վաշինգտոնում Թուրքիայի դեսպանատան շահերն Արցախյան 44-օրյա պատերազմի ժամանակ։ Համբարյանը հայտարարել է, որ ՀՀ վարչապետ Նիկոլ Փաշինյանը Միացյալ Նահանգներում երկրի դեսպանատան միջոցով բոլոր ամերիկյան լոբբիստական ​​ընկերությունների շարքում ընտրել է հենց այն մեկը, որի «հաշվին թուրքական փողեր կան, իսկ ձեռքերին՝ հայկական արյուն»։

«Առևտրային միջնորդները՝ մարդիկ, որոնք պատրաստ են փողի դիմաց ծառայել նույնիսկ ցեղասպանության մեղավորներին, իրավունք չունեն խոսելու հայերի՝ Ցեղասպանությունը վերապրած պետության ժառանգների անունից»,- նշել է Համբարյանը։

ANCA-ի խոսնակը շեշտել է, որ Mercury-ի նվիրվածության և իսկապես աշխատելու պատրաստակամության մակարդակն սկսվում է այնտեղ, որտեղ «ավարտվում է փողի վերջին տրանշը՝ լինի դա Հայաստանից, թե Անկարայի և Բաքվի բռնապետերից, որոնք վճռականորեն տրամադրված են հայերին երկրի երեսից ջնջելուն»։ «Սա ներկայացուցչություն չէ, սա աճուրդ է»,- եզրափակել է նա։ 2025թ. ապրիլի 1-ին ԱՄՆ-ում Հայաստանի դեսպանատունը, ըստ Հայ դատի հանձնախմբի, վարձել էր Mercury Public Affairs-ին՝ ԱՄՆ Կոնգրեսում և վարչակազմում իր շահերը ներկայացնելու համար։ 2020 թվականի փետրվարին Mercury-ն 1 միլիոն դոլարի պայմանագիր էր կնքել Վաշինգտոնում գտնվող Թուրքիայի դեսպանատան հետ, ինչը 2020-ի հոկտեմբերին խզել էր Հայ դատի հանձնախմբի և Նահանգների այլ հայկական կազմակերպությունների ճնշման տակ։