«Լավ ընտանիք», «սիրել և սիրված լինել», «խաղաղություն». ո՞րն է հայ կանանց երջանիկ լինելու գրավականը

Հայաստանում մարտի 8-ից ապրիլի 7-ը համարվում է կանանց միամսյակ․ մարտի 8-ը Կանանց միջազգային օրն է, իսկ ապրիլի 7-ը, ըստ Հայ առաքելական եկեղեցու տոնացույցի, Սուրբ Աստվածածնի ավետման օրն է և նշվում է որպես Մայրության և գեղեցկության տոն։ Ըստ հոգեբանների՝ կանայք հաճախ առանձնացնում են իրենց հասկացող զուգընկեր, ամուր ընտանիք ունենալու, կարիերայում հաջողության հասնելու, անհանգստություն չունելու և շատ ճամփորդելու ցանկությունները։ Կանայք ցանկանում են իրենց ընդունել այնպիսին, ինչպիսին կան և չլինել, այսպես ասած, ամենագեղեցիկը լինելու մրցավազքի գերին։

Armenia Today-ի նկարահանող խումբը Երևանի փողոցներում աղջիկներին ու կանանց հարցրել է, թե ի՞նչ է իրենց համար կանացի երջանկությունը, ինչի՞ մասին են երազում, և ի՞նչն է նրանց մեծ վստահություն տալիս։

Հարցված կանանց մի մասը պատասխանեց, որ երջանիկ են, քանի որ ունեն լավ ընտանիք, երեխաներ, լավ աշխատանք։

«Կանացի երջանկությունը դա լավ ընտանիք ունենալն է, երեխաներ, որոնց կարողանում ես դաստիարակել որպես լավ քաղաքացի։ Կարևոր է շրջապատում հարգված լինելը, լավ աշխատանք ունենալը, ես այն կարծիքն ունեմ, որ կինը պետք է միշտ աշխատի։ Եթե կարողանում ես այս ամենը ճիշտ համատեղել, ուրեմն երջանիկ ես»,- ասաց մի կին՝ հավելելով, որ պարտադիր է սիրել և սիրված լինել։

Մեկ այլ կնոջ խոսքով՝ պետք է հոգեպես հանգիստ լինել, ընտանիքում ու երեխաների հետ՝ հաշտ, աշխատանքում ունենալ վերելքներ, ինչից կինն իրեն բավարարված է զգում։

Երազանքների մասին խոսելիս կանայք կարևորեցին հայրենիքի ու սահմանների խաղաղությունը։

«Խաղաղություն, առողջություն և, իհարկե, հարազատների անփորձանք լինելու հանգամանքը»,- ասաց նրանցից մեկը։

Կանանցից մեկն էլ նշեց, որ երազում է ժպիտներ տեսնել, որպեսզի կանանց մեջ սեր ու վստահությունը շատ լինի։

Մանրամասները՝ տեսանյութում։