Մարտի 23-ին ֆուտբոլի Հայաստանի հավաքականն ՈՒԵՖԱ-ի Ազգերի լիգայի փլեյ-օֆֆում 1։6 հաշվով պարտվել էր Վրաստանի ընտրանուն։ Մարտի 20-ին Հայաստանի հավաքականը սեփական հարկի տակ կայացած խաղում վրացիներին զիջել էր 0։3 հաշվով։ Մարտի 24-ին հոլանդական «Այաքսի», Մոսկվայի «Սպարտակի» և Հայաստանի հավաքականի նախկին խաղացող Արաս Օզբիլիզը մեղադրել էր Հայաստանի ֆուտբոլի ֆեդերացիային (ՀՖՖ) «հայկական ֆուտբոլը ոչնչացնելու» համար։
Armenia Today-ը երևանցիներից հետաքրքրվել է, թե ինչպե՞ս են գնահատում Հայաստան-Վրաստան խաղի արդյունքները, ո՞րն է խնդիրը և ինչպե՞ս են գնահատում ՀՖՖ ղեկավար Արմեն Մելիքբեկյանի աշխատանքը։
Հարցվածների մեծամասնությունը, որպես պարտության պատճառ, նշել է Հայաստանի հավաքականի վատ պատրաստվածությունը։ Գրեթե բոլոր հարցվածները նշել են, որ տեղյակ չեն ՀՖՖ ղեկավարի աշխատանքից, ուստի դժվարացել են գնահատել նրա իրավասությունը։
Հարցման մասնակիցներից մեկը նշել է, որ թիմի պարտությունը պայմանավորված էր խաղացողների ոչ պատշաճ կազմակերպվածությամբ և պատրաստվածությամբ։
«Վատ են կազմակերպել, և նախապատրաստական աշխատանքները համապատասխան չեն, Մելիքբեկյանի աշխատանքը բավարար եմ գնահատում։ Հավաքականի խաղի արդյունքներն ինքնին խոսուն են, և մեր գնահատականը ոչինչ չի փոխում»,- ասել է քաղաքացիներից մեկը։
Մեկ այլ հարցվող նշել է, որ Հայաստանի հավաքականը վատ է խաղացել։
«Նրանց պարտության պատճառն այն է, որ խաղում են առանց արժանապատվության»,- ասել է քաղաքացին՝ դժվարանալով գնահատական տալ Մելիքբեկյանի աշխատանքին։
Մեկ այլ քաղաքացի վստահ է, որ ազգային հավաքականի պարտության պատճառը թիմային խաղի բացակայությունն է։
Հարցման մեկ այլ մասնակից կարծում է, որ Հայաստանի թիմն արել է այն ամենը, ինչ կարող էր։
«Մեր հավաքականի ֆուտբոլիստները երևի մի քիչ թույլ են, բայց նրանք կարող են իրենց դրսևորել շատ ավելի լավ կողմից», – նշել է նա։
Հարցվողը ասել է, որ չի կարող գնահատել ֆուտբոլի ֆեդերացիայի ղեկավարության աշխատանքը, քանի որ «եզրակացություն անելու համար բավարար տեղեկություններ չունի»:
Armenia Today-ի «Հայաստանի ժողովրդի ձայնը» հետազոտական հատուկ նախագծի հարցման մասնակիցների ավելի քան 50%-ը կարծում է, որ Հայաստանի հավաքականի պարտության համար մեղավոր է ՀՖՖ նախագահը: Նրանց կարծիքով՝ «հայկական ֆուտբոլում վաղուց աղետ է»։ Մարտի 25-ի AT Telegram ալիքում անցկացված հարցմանը մասնակցել էր 195 մարդ:
Հարցման արդյունքների համաձայն՝ դրա մասնակիցների 17%-ը մեղադրել է ազգային հավաքականի խաղացողներին։ Նրանք նշել են, որ գոլերի մեծ մասը բաց են թողնվել ֆուտբոլիստների անհատական սխալների պատճառով։ Հարցվածների 12 տոկոսի կարծիքով՝ Հայաստանի հավաքականի պարտության համար ոչ ոք մեղավոր չէ։ Միաժամանակ, նրանք մատնանշել են, որ Վրաստանը պարզապես շատ ուժեղ թիմ ունի։ Եվ հետազոտության մասնակիցների միայն 4%-ն է մեղավոր համարում ազգային հավաքականի գլխավոր մարզիչ Ջոն վան’տ Սխիպին։
Մանրամասները՝ տեսանյութում:
