Բրյուսովի համալսարանի ուսանողները բուհի էջում նախապես տարածած հաղորդագրության համաձայն՝ երթով հասան Կառավարության շենքի մոտ և իրենց բողոքի ձայնը բարձրացրին բուհերի միավորման դեմ:
Նրանք դեմ են Խաչատուր Աբովյանի անվան մանկավարժական համալսարանին և Ֆիզիկական կուլտուրայի հայկական պետական ինստիտուտին միանալու կառավարության որոշմանը:
«Որ բուհ ընդունվել ենք, այդ բուհի դիպլոմ էլ ստանալու ենք»,- ասում են բուհի ուսանողները: Նրանք դեմ են, որ Բրյուսով անվանումը լուծվի այլ անվան տակ ու վերանա:
«Հարցը ոչ թե հասցեն ու շենքն են, այլ Բրյուսով բրենդը»,- ասում են ցույցի մասնակիցները՝ նշելով, որ հնարավոր է՝ կառավարությանը պետք չէ կրթված ու բանիմաց սերունդ, սակայն թող չմոռանան, որ հենց իրենք են լինելու նաև կառավարության անդամների երեխաներին ապագայում կրթողը:
Ուսանողներից մեկն ասում է, որ ուսանողներին միաձուլելու նպատակը երիտասարդներին, ուսանողությանը հեշտ կառավարելն է, ինչին գնում են իշխանություննեևը: Նշում է, որ 2020 թվականից մինչ օրս կրթական համակարգում պարբերաբար ինչ-որ խժդժանքներ են, ինչը խանգարում է համալսարաններում բնականոն պրոցեսին:
Ուսանողները պնդում են, որ չի կարող բարի նպատակներ ունենալ մի նախագիծ, որը նախարարի մակարդակով գաղտնի է պահվել իրենցից:
Հիշեցնենք, որ Բրյուսովի անվան համալսարանի դեկան Ցոլակ Ակոպյանը հայտնել էր, որ բուհի հոգաբարձուների խորհրդի նախորդ օրը տեղի ունեցած նիստում կառավարության ներկայացուցիչները դեմ են քվեարկել օրակարգի հաստատմանը, որում ներառված է եղել բուհի ռեկտորի ընտրության մրցույթ հայտարարելու հարցը՝ վկայակոչելով առաջիկայում բուհերի միավորումը որպես փաստարկ:
Վարչապետ Նիկոլ Փաշինյանը սեպտեմբերի 12-ին այցելել է Արագածոտնի մարզի Աշտարակ քաղաքում գտնվող ՀՀ ԳԱԱ Ֆիզիկական հետազոտությունների ինստիտուտ, որտեղ քննարկվել է Ակադեմիական քաղաքի կոնցեպտը:
Նշվում է, որ ակադեմիական քաղաքում տեղակայվելու է մինչև 8 բուհ՝ իր բոլոր ենթակառուցվածքներով: Արդեն իսկ մշակվել է քաղաքի նախնական հատակագիծը, ըստ որի՝ Ակադեմիական քաղաքում ստեղծվելու են ուսանողների և պրոֆեսորադասախոսական կազմի համար անհրաժեշտ բոլոր պայմանները: Բացի բուհերից, քաղաքում հիմնվելու են նաև բնակելի հատվածներ, հետազոտական կենտրոններ, մարզական ենթակառուցվածքներ, զբոսայգի, ամֆիթատրոն: Քաղաքը նախատեսված է լինելու մինչև 50 հազար մարդու համար:
Նշենք, որ Կառավարության նիստում վարչապետ Նիկոլ Փաշինյանը հայտարարել է, որ մտադիր է գնալ բուհերի խոշորացման ճանապարհով՝ ունենալով առավելագույնը 8 պետական բուհ: Կառավարությունը արդեն կողմնորոշվել է ակադեմիական քաղաքի տեղադիրքի հարցով: Այն կկառուցվի Աշտարակում և միավորվող բուհերը ժամանակի ընթացքում կտեղափոխվեն այնտեղ:
